قىتاي تۋروپەراتورلارى شىعىس قازاقستانعا تۋريست اكەلۋگە قىزىعۋشىلىق تانىتىپ وتىر
وسكەمەن. KAZINFORM - شىعىس قازاقستان وبلىسىندا قىتايلىق تۋريستىك كومپانيالاردىڭ وكىلدەرىمەن كەزدەسۋ ءوتىپ، تۋريزم سالاسىنداعى ەكىجاقتى ارىپتەستىك جايى تالقىلاندى.
ش ق و كاسىپكەرلىك جانە يندۋستريالدىق-يننوۆاتسيالىق دامۋ باسقارماسىنىڭ باسشىسى ارداق ماديەۆ قىتاي حالىق رەسپۋبليكاسىنىڭ شىڭجاڭ-ۇيعىر اۆتونوميالىق اۋدانىنداعى تۋريستىك كومپانيالاردىڭ وكىلدەرىمەن كەزدەستى.
مۇنداعى ماقسات - ترانسشەكارالىق ىنتىماقتاستىقتى دامىتۋ جانە تۋريزم سالاسىنداعى ەكىجاقتى بايلانىستى نىعايتۋ.
- 2025-جىلى قىتايدىڭ قازاقستانداعى تۋريزم جىلى وتەدى. سوعان جان-جاقتى دايىندىق جۇرگىزىپ جاتىرمىز. قىتايلىق تۋريستەردىڭ قىزىعۋشىلىقتارىن زەرتتەپ شىقتىق. قازاقستانداعى اسەم تابيعاتتىڭ 47 پايىزى ش ق و- دا شوعىرلانعان. مۇندا تاۋ دا، سۋ دا، ورمان دا بار. سول ءۇشىن كورشى ەلدەن كەلگىسى كەلەتىندەر كوپ بولادى دەگەن نيەتتەمىز، - دەيدى ارداق ماديەۆ.
ءبىر جىلدا قىتايدان الەمنىڭ ءار تۇكپىرىنە 150 ميلليون تۋريست ساياحاتقا شىعادى ەكەن. ال شىعىس قازاقستاننىڭ تۋريستىك نىساندارى ءبىر مەزەتتە 20 مىڭ تۋريستى قابىلداي الادى.
- تۋريستەر ءۇشىن دەمالىستىڭ سان الۋان ءتۇرىن ۇسىنباقپىز. جەكە جانە توپتىق تۋرلار بولادى. ءبىر توپتىق تۋردا 30-35 ادام قامتىلادى. ال وبلىستاعى تۋريستىك وبەكتىلەر مودەرنيزاتسيالاۋدان وتكەن سوڭ بۇل ساندى كوبەيتۋگە بولادى. قىتاي ەلىمەن دە بىرلەسىپ ءتۇرلى اۋقىمدى جوبالاردى قولعا العىمىز كەلەدى، - دەيدى ش ق و كاسىپكەرلىك جانە يندۋستريالدىق-يننوۆاتسيالىق دامۋ باسقارماسىنىڭ باسشىسى.
شىعىس قازاقستان مەن الماتى قالاسى ورتاق تۋرپاكەت ازىرلەپ جاتىر. سول ارقىلى تۋريست ءبىرىنشى الماتىعا كەلىپ، سوسىن ش ق و- نى تاماشالاي الادى. وسىلاي ءبىر ساپاردا قازاقستاننىڭ ەكى كورىكتى وڭىرىنە بارادى.
- ءبىز قىسقى تۋريزممەن اينالىسامىز. ءوزىم بۇرىن شىعىس قازاقستاندا جۇمىس ىستەگەنمىن. سول ءۇشىن بۇل جاق ماعان ىستىق. ولكەنىڭ تاريحى تەرەڭ، تابيعاتى سۇلۋ. قىتايدا حالىققا جارناما جاساپ، تۋريستەردى وسىندا تارتىپ جاتىرمىز. مىسالى، التاي ايماعىندا 3 ۇلكەن تاۋ شاڭعىسى كۋرورتى بار. سولارعا جىل سايىن 150 مىڭ ادام بارىپ دەمالادى. سولاردىڭ ءبىرازىن ش ق و- عا جىبەرۋگە بولادى، - دەيدى شىڭجاڭ-ۇيعىر اۆتونوميالىق اۋدانىنداعى تۋريستىك كومپانيالاردىڭ ءبىرىنىڭ وكىلى گو شاوتسزيان.
