قىتاي تاۋارلارىن قازاقستان ارقىلى وتكىزۋ ءۇشىن جاڭا تەمىرجول سالۋ كەرەك - دەپۋتات
استانا. KAZINFORM - قىتاي تاۋارلارىن قازاقستان ارقىلى ترانزيتپەن وتكىزۋ ءۇشىن تار تاباندى جاڭا تەمىرجولدى سالۋ كەرەك. بۇل تۋرالى Kazinform اگەنتتىگىنىڭ پودكاسىندا ەكونوميست، تاۋەلسىز ساراپشى ەرلان كاريموۆ ءمالىم ەتتى.
- ءىرى ينفراقۇرىلىمدىق جوبالاردى قولداۋ كەرەك. مەنىڭ ويىمشا، قازاقستاندى العا سۇيرەيتىن ەكونوميكالىق باعىتتاردى ءبىرىنشى كەزەكتە قارجىلاندىرۋىمىز كەرەك... قازاقستان ارقىلى ترانزيتپەن قىتاي تاۋارلارى وتەدى. قىتايلىقتار وزدەرىنىڭ تاۋارلارىن وتكىزۋگە باسىمدىق بەرۋدى سۇراپ وتىر. بۇل رەتتە، ءتيىستى ۇسىنىستاردى ۇنەمى ايتىپ كەلەمىن. نەگە ءبىز قىتاي جاعىمەن بىرلەسىپ، قورعاستان قۇرىق پورتىنا دەيىن تار تاباندى تەمىرجول سالمايمىز؟ ويتكەنى، قىتاي قىرعىزستان، وزبەكستان، تۇرىكمەنستان سەكىلدى بەس مەملەكەت ارقىلى وتەتىن تەمىرجول سالماقشى. بۇل جوباعا شامامەن 5 ميلليارد ا ق ش دوللار قاراجات بولەدى. دەگەنمەن، وسى 5 ەلدىڭ شەكاراسىنان وتۋگە ۋاقىت كەرەك، سونداي-اق تاۋلى جەرلەرگە ۇڭگىرجول سالۋ شىعىندارى بار.
ال قازاقستاننىڭ جازىق دالاسى ارقىلى جول سالۋ جەڭىل بولادى، - دەدى ە. كاريموۆ.
ونىڭ پايىمىنشا، قىتايلىق تاۋارلاردى ەلىمىز ارقىلى وتكىزۋگە تار تاباندى تەمىرجول سالىنسا، قازاقستاننىڭ ترانزيتتىك الەۋەتى ەداۋىر ارتادى.
- ەلىمىز ارقىلى ءبىر كۇندە وتەتىندەي سالۋعا بولادى. ماسەلەن، قىتايدا تار تاباندى، ال بىزدە كەڭ تاباندى تەمىرجول پايدالانىلىپ كەلەدى. ءبىزدىڭ شەكاراعا كەلگەن كەزدە، ولار تاباندارىن اۋىستىرادى. بۇعان - ۋاقىت كەرەك. بيزنەستىڭ دامۋى ءۇشىن تاۋاردىڭ ساپاسى، تاۋار باعاسى جانە ونى جەتكىزۋ جىلدامدىعى سياقتى ءۇش تالاپتى ورىنداۋ قاجەت. قىتايدا تاۋار ساپارى جاقسارىپ جاتقانىن كورىپ وتىرمىز جانە باعاسى دا وتە قولايلى. قازىر ولارعا جەتكىزۋ جىلدامدىعى جەتىسپەي وتىر. ەگەر ولارعا تار تاباندى جولدى ۇسىنا الساق، ءبىزدىڭ لوگيستيكالىق الەۋتەمىز ارتادى. سوندىقتان وسى جوبانى جۇزەگە اسىرۋدا قازاقستاننىڭ بارلىق مۇمكىندىگى بار، - دەدى ساراپشى.
ايتا كەتەيىك، قىتاي العاشقى ءتورت ايدا 1,4 تريلليون دوللار قۇرايتىن جاڭا نەسيە بەردى.
