قىتاي كومپانياسى الماتىدا تاۋ-كەن سالاسىنا ارنالعان عىلىمي-زەرتتەۋ ينستيتۋتىن اشادى
الماتى. KAZINFORM - ەلىمىزدىڭ وڭتۇستىك استاناسىندا «الماتى-شاڭحاي» بيزنەس فورۋمى ءوتىپ جاتىر.
الماتى اكىمدىگىنىڭ مالىمەتىنشە، ءىس-شارا بارىسىندا Beijing Fuxing Yihua Technology Co. Ltd. كومپانياسى ينۆەستيتسيالىق جوباسىن تانىستىردى. باستاما اياسىندا قالادا تاۋ-كەن ونەركاسىبىنە باعىتتالعان عىلىمي-زەرتتەۋ ينستيتۋتىن اشۋ جوسپارلانىپ وتىر.
جوبا مينەرالدىق شيكىزاتتىڭ قۇرامىن تالداۋعا، بايىتۋ سىناقتارىن جوبالاۋعا جانە مەتاللۋرگيالىق ۇدەرىستەردى ازىرلەۋگە ماماندانباق. بەيجىڭدەگى Fuxing Yihua كومپانياسىنىڭ وكىلدەرى قازاقستان تاۋ-كەن سالاسىندا ايتارلىقتاي الەۋەتكە يە ەكەنىن اتاپ ءوتتى. ءبىراق ونىڭ ايتۋىنشا، ءبىرقاتار باعىتتا عىلىمي-تەحنولوگيالىق ساراپتاما تاپشىلىعى ساقتالىپ وتىر.
- قازاقستان - تاۋ-كەن ءوندىرىسى قارقىندى دامىعان ءىرى ەلدەردىڭ ءبىرى. مينەرالدىق شيكىزاتتى تالداۋ، بايىتۋ سىناقتارىن جۇرگىزۋ جانە مەتاللۋرگيالىق ۇدەرىستەردى ازىرلەۋ باعىتتارىندا ءالى دە سۇرانىس بار. ءبىز بۇل نارىقتىڭ مۇمكىندىگىن جوعارى باعالايمىز، - دەدى كومپانيا وكىلدەرى.
ەكى مەگاپوليس اراسىنداعى ساۋدا-ەكونوميكالىق جانە ينۆەستيتسيالىق بايلانىستى نىعايتۋعا باعىتتالعان «الماتى-شاڭحاي» بيزنەس فورۋمىنا شاڭحاي مەرى گۋن چجەن باستاعان دەلەگاتسيا قاتىستى. فورۋم قورىتىندىسى بويىنشا 2,7 ميلليارد ا ق ش دوللارىنان اساتىن بىرلەسكەن ينۆەستيتسيالىق جوبالاردى ىسكە اسىرۋعا باعىتتالعان ءبىرقاتار ستراتەگيالىق ماڭىزدى مەموراندۋم مەن كەلىسىمگە قول قويىلدى.
ەسكە سالايىق، قازاقستاندا عىلىمي-زەرتتەۋ جۇمىستارىنا جۇمسالعان شىعىندار 19 پايىزعا ءوستى.
