قىتاي شەتەلدىكتەر ءۇشىن ۆيزا تالاپتارىن جەڭىلدەتتى

استانا. KAZINFORM - قىتاي شەتەلدىكتەر ءۇشىن ۆيزا تالاپتارىن تاعى جەڭىلدەتتى، دەپ حابارلايدى 24kz.

ەندى كورشى ەلگە 59 مەملەكەتتىڭ ازاماتتارى كەلە الادى.

تەك بۇل جەڭىلدىك ەلدىڭ ساناۋلى پورتىندا عانا جۇزەگە اسادى. ءسويتىپ، ۆيزا ساياساتىن وڭتايلاندىرۋدىڭ ارقاسىندا قىتايعا ميلليونداعان شەتەلدىك اعىلا باستادى.

قازىر قىتاي بيلىگى پاندەميا كەزىندە تۇرالاپ قالعان تۋريزمدى دامىتۋ ءۇشىن ءتۇرلى امالدارعا بارىپ جاتىر. ۆيزاعا قاتىستى جاڭا ساياسات ساياحاتشىلارعا ىڭعايلى. شەتەلدىكتەردىڭ قىتايعا كەلۋىن جەڭىلدەتۋگە باعىتتالعان. ەندى تۋريستەر 144 ساعاتتىق ترانزيت كەزىندە ۆيزا راسىمدەۋگە مىندەتتەلمەيدى. الايدا ول قىتايدىڭ بارلىق بولىگىندە ەمەس.

بۇعان دەيىن بۇل گونكونگ پەن ماكاو سياقتى ارنايى اكىمشىلىك اۋداندارىنان جانە حالىقارالىق وڭتۇستىك- شىعىس ازيا ەلدەرىنىڭ قاۋىمداستىعىنا كىرەتىن مەملەكەتتەردەن كەلەتىن تۋريستەر توبىنا عانا قولجەتىمدى ەدى. تىڭ باستاما تيىمدىلىگىن كورسەتىپ، تۋريزم سالاسى جانداندى. ەندى ەل بيلىگى بىردەن ۆيزاعا قاتىستى كەدەرگىلەردى بارىنشا ازايتتى. بۇل جەڭىلدىكتەر ەلگە 5,9 ميلليون شەتەلدىك تۋريست تارتۋعا مۇمكىندىك بەردى. بۇل جونىندە قىتايدىڭ ۇلتتىق كوشى-قون اكىمشىلىگىنىڭ رەسمي وكىلى بريفينگ كەزىندە مالىمدەدى.

ليۋ حايتاو، قىتايدىڭ ۇلتتىق كوشى-قون اكىمشىلىگى ديرەكتورىنىڭ ورىنباسارى:

- ءبىز ۆيزاسىز رەجيمدى جەڭىلدەتۋعا باعىتتالعان 110 شارا قابىلدادىق. بۇل شەتەلدىكتەردىڭ قىتايعا ساپارىن الدەقايدا جەڭىلدەتتى. ەڭ الدىمەن ساياحاتشىلار ءۇشىن اشىقتىق، اقپاراتقا قولجەتىمدىلىك پەن قاۋىپسىزدىك ارتتى. 144 ساعاتتىق ۆيزاسىز ترانزيت ساياساتى تۋرالى لەزدە تاراپ، سۇرانىس ارتتى. قازىر بۇل 37 پورتتا 54 مەملەكەتتىڭ ازاماتتارى ءۇشىن قولجەتىمدى.

جىل باسىنان بەرى قىتايعا وسى پورتتار ارقىلى 17 ميلليون 250 مىڭنان استام شەتەلدىك ساياحاتشى كىرگەن. بۇل الدىڭعى جىلمەن سالىستىرعاندا %130- كە كوپ. سونىمەن قاتار حاينان تۋريستىك ايماعىنا 59 مەملەكەتتىڭ ازاماتى 30 كۇن بويى ۆيزاسىز ساياحاتتاي الادى.

ۇلتتىق ستاتيستيكا بيۋروسىنىڭ مالىمەتىنە سايكەس، قىتايعا كەلگەن ءاربىر شەتەلدىك تۋريست ورتا ەسەپپەن تاۋلىگىنە 484 ا ق ش دوللارى شاماسىندا قاراجات جۇمساعان. وسىنىڭ ارقاسىندا تۋريزمنەن تۇسكەن تابىس ارتتى. كەيىنگى 7 ايدا شەتەلدىك تۋريستەردەن 381 ميلليارد ا ق ش دوللارى ءتۇسىپتى.

ايتا كەتۋ كەرەك، ەلدىڭ ىشكى تۋريزمى قارقىندى دامىپ كەلەدى. العاشقى جارتى جىلدىقتا 2 ميلليارد 725 ميلليون ادام قىتاي ىشىندە ساياحاتتاعان. بۇل 2023 -جىلدىڭ وسى كەزەڭىمەن سالىستىرعاندا %15- كە كوپ.