قازاقستاندا ونلاين نەسيەلەۋ قاتاڭ رەتتەلەدى

استانا. KAZINFORM - قازاقستاندا ونلاين نەسيەلەۋ قاتاڭ رەتتەلەدى جانە نەسيە بەرۋ شارتتارى قايتا قارالادى. كوللەكتورلىق ۇيىمدارعا كرەديتتەردى ساتۋعا ءىشىنارا تىيىم سالىنىپ، بالالى وتباسىلاردىڭ جالعىز باسپاناسىنان ايىرىلۋىنا جول بەرىلمەيدى. بۇل تۋرالى ق ر پرەمەر-ءمينيسترىنىڭ ورىنباسارى - قارجى ءمينيسترىنىڭ مىندەتىن اتقارۋشى ەرۇلان جاماۋبايەۆ ايتىپ بەردى.

وتكەن جىلى ەلىمىزدىڭ 8 وڭىردە «قارىزسىز قوعام» پيلوتتىق جوباسى وتكىزىلدى جانە 65 مىڭ تۇرعىن قارجىلىق ساۋات نەگىزدەرىن وقىپ شىقتى. ال بيىل 750 مىڭ وتانداسىمىز قاراجاتتى ۇتىمدى باسقارىپ، شىعىندارىن وڭتايلاندىرۋدى ۇيرەنەدى.

بۇگىنگى تاڭدا 9 مەملەكەتتىك ورگان جانە ەكىنشى دەڭگەيلى 11 بانك اراسىندا الداعى ءۇش جىلعا ارنالعان ىنتىماقتاستىق تۋرالى مەموراندۋمعا قول قويىلدى. التى نەگىزگى باعىت بويىنشا 25 ءىس-شارانى قامتيتىن ءتيىستى جول كارتاسى ازىرلەنىپ، ىسكە اسىرىلۋدا. وقۋ جانە ۇيىمداستىرۋ شارالارىنان باستاپ، نەسيە بەرۋ جانە قارىز الۋشىلاردىڭ قۇقىعىن قورعاۋ سالاسىنداعى زاڭناما جەتىلدىرىلۋدە.

«AMANAT» پارتياسىنىڭ اتقارۋشى حاتشىسى داۋلەت كارىبەكتىڭ ايتۋىنشا، بيىل ەلىمىزدىڭ بارلىق 20 وڭىرىندە 200 مىڭ ادامدى وقىتۋ جوسپارلانۋدا. سونداي-اق مەكتەپ، كوللەدج جانە جوعارى وقۋ ورنىنا ارنالعان ادىستەمەلىك قۇرالدار ازىرلەنەدى. بۇل شامامەن 100 مىڭ ستۋدەنت پەن 450 مىڭ وقۋشىنى قاراجاتقا نەعۇرلىم جاۋاپتى قاراۋعا ۇيرەتۋگە مۇمكىندىك بەرەدى.

«بيىل قارجىلىق ساۋاتتى مەكتەپ قابىرعاسىنان باستاپ ارتتىرۋدى قولعا الامىز. سونداي-اق، ەلىمىزدىڭ بارلىق 20 وڭىرىندە پارتيامىزدىڭ فيليالدارى جانىنان «قارىزسىز قوعام» جوبالىق كەڭسەلەرى اشىلادى. وندا كەز كەلگەن ادام قارجىلىق جانە قۇقىقتىق ماسەلەلەر بويىنشا كەڭەس الا الادى. بۇگىندە ءاربىر ەكىنشى قاتىسۋشىنىڭ وتباسىنداعى ورتاق تابىسى 100 مىڭ تەڭگەگە دە جەتپەيدى. سونىمەن قاتار، كۋرستان وتكەن ازاماتتاردىڭ ۇشتەن بىرىندە ەكى نەمەسە ودان دا كوپ نەسيە بار. قاتىسۋشىلار اراسىندا بالاسىنىڭ نەسيەسىن تولەۋگە ءماجبۇر بولعان زەينەتكەرلەر دە كەزدەستى. جوبانىڭ نەگىزگى ماقساتى - ادامدارعا نەسيە اۋىرتپاشىلىعىن جەڭىلدەتۋگە كومەكتەسۋ»، - دەدى ول «AMANAT» پارتياسىنىڭ ورتالىق اپپاراتىندا «قارىزسىز قوعام» پارتيالىق جوباسىن جۇزەگە اسىرۋ بويىنشا جينالىستا.

ال «قارىزسىز قوعام» جوباسىنىڭ جەتەكشىسى اقمارال بەكمۇرزايەۆانىڭ ايتۋىنشا، قارىزىن وتەي الماي جۇرگەن قازاقستاندىقتار سانى كۇننەن- كۇنگە كوبەيىپ كەلەدى. قارجىلىق ءبىلىم ساپاسىنىڭ تومەندىگىنەن ەل اراسىندا «بورىشكەر سيندرومى» كەڭ ەتەك العان.

«نەسيەگە باتقان حالىقتى وڭالتۋ بويىنشا مەملەكەتتىك باعدارلاما قاجەت دەپ ەسەپتەيمىز. ءبىزدىڭ جوبا ولاردىڭ جاعدايىن جەڭىلدەتكەنىمەن، نەسيەلەنۋ ماسەلەسىن تولىق شەشە المايتىنىن تۇسىنەمىز. ەلىمىزدە 1,7 ميلليون ادامنىڭ نەسيە تولەۋ مەرزىمى 90 كۇننەن استام ۋاقىت كەشىكتىرىلگەن، بۇل كورسەتكىش جىل سايىن وسۋدە. ازاماتتاردىڭ وسى ساناتىمەن ءىس جۇزىندە ەشكىم اينالىسپايدى. ءبىزدىڭ جوبانى ىسكە اسىرۋ تاجىريبەسىنەن ايتا الامىن، ولاردىڭ بارلىعى نەسيەلىك تاريحى بۇزىلعاندىقتان، مەملەكەتتىك جەڭىلدەتىلگەن نەسيەلەۋ، گرانت بەرۋ باعدارلامالارىنا قاتىسا المايدى. اسىرەسە نەسيە الۋشىلار مەن قارىزعا باتقانداردىڭ كوپشىلىگى - ايەلدەر»، - دەدى ا. بەكمۇرزايەۆا.

ق ر پرەمەر-ءمينيسترىنىڭ ورىنباسارى - قارجى ءمينيسترىنىڭ مىندەتىن اتقارۋشى ەرۇلان جاماۋبايەۆ جالپى نەسيە العاندار سانى 8-9 ميلليون ادامعا جەتەتىنىن، تۇتىنۋشىلىق نەسيە بويىنشا 13 تريلليون تەڭگە قاراجات حالىققا جۇك بولىپ وتىرعانىن ايتتى.

«جاعدايدى تۇبەگەيلى تۇزەتۋ ءۇشىن ۇكىمەت مەملەكەتتىك ورگاندارمەن بىرلەسىپ، جۇيەلى شارالاردى ىسكە اسىرۋدى جالعاستىرادى. بۇل رەتتە ازاماتتاردىڭ قارجىلىق ساۋاتىن ارتتىرۋ وتە ماڭىزدى. سوندىقتان ەلىمىزدىڭ بارلىق وڭىرلەرىندە «قارىزسىز قوعام» جوباسىن تولىققاندى ىسكە اسىرىلۋىن جاريالايمىز. بۇدان باسقا، ءبىز ونلاين نەسيەلەۋدى قاتاڭ رەتتەيمىز. نەسيە بەرۋدىڭ كوپ جاعدايدا شارتتارى وتە قيىن، اۋىر، سونى قايتا قاراستىرامىز. كوللەكتورلىق ۇيىمدارعا كرەديتتەردى ساتۋعا ءىشىنارا تىيىم سالۋ قوسىمشا پىسىقتالادى. بالالارى بار وتباسىلاردىڭ جالعىز باسپاناسىنان ايىرىلىپ، كوشەدە قالۋىنا جول بەرمەۋىمىز كەرەك. وسىعان بايلانىستى، قارجى نارىعىن رەتتەۋ جانە دامىتۋ اگەنتتىگى AMANAT پارتياسىمەن جانە مەملەكەتتىك ورگاندارمەن بىرلەسىپ، جول كارتاسىنىڭ ءىس-شارالارىن ساپالى جانە تولىققاندى ورىندالۋىن قامتاماسىز ەتۋى ءتيىس. جەرگىلىكتى اتقارۋشى ورگاندارعا جوسپارلانعان ءىس-شارالاردى جۇزەگە اسىرۋعا بەلسەندى قاتىسۋدى تاپسىرامىن. ءبىز حالىقتىڭ شامادان تىس نەسيەلەنۋىن ازايتۋ ءۇشىن بارىنشا كۇش سالىپ، بىرىگىپ جۇمىس ىستەگەندە عانا ناتيجەگە قول جەتكىزە الامىز»، - دەدى ە. جاماۋبايەۆ.

ەسكە سالا كەتەيىك، «قارىزسىز قوعام» جوباسى بىلتىر 2-مامىردا پيلوتتىق رەجيمدە باستاۋ الدى. ساراپشىلار دارىسىنەن بولەك، جوباعا قاتىسۋشىلار enbek.kz پورتالىنا تىركەلۋ جانە جەكە كاسىپكەرلىك اشۋدان باستاپ، سوتتان تىس بانكروتتىقتى سۇيەمەلدەۋ جانە بەرەشەكتى وتەۋ كەستەسىن ازىرلەۋگە دەيىنگى ءتۇرلى سۇراقتار بويىنشا كەڭەس الادى.

سونداي-اق، وقىتۋ بارىسىندا قاتىسۋشىلارعا زاڭگەر كومەگىنە كەپىلدىك بەرىلەدى. ولار ءار قارىز الۋشىنىڭ نەسيە تاريحىن جەكە زەرتتەپ، قارىز جۇكتەمەسىن جەڭىلدەتۋ بويىنشا كەڭەس بەرەدى.

كۋرسقا جازىلۋ ءۇشىن تۇرعىلىقتى جەرى بويىنشا «AMANAT» پارتياسىنىڭ اۋداندىق فيليالىنا نەمەسە اكىمدىككە حابارلاسۋ قاجەت. جوباعا قاتىسۋشىلار كۇندىزگى فورماتتا 5 كۇن بويى ءبىلىم الادى.

اۆتور

ايجان سەرىكجان قىزى