قىتاي 2050-جىلعا قاراي 30 دان استام عارىشتىق عىلىمي ميسسياسىن ىسكە قوسادى

استانا. KAZINFORM - قىتاي عارىشتىق عىلىمدى دامىتۋدىڭ ۇلتتىق ورتا جانە ۇزاق مەرزىمدى باعدارلاماسىن ۇسىندى. ول 2024-2050 -جىلدار ارالىعىندا ەلدەگى عارىشتىق ۇشۋلار مەن زەرتتەۋلەر جوسپارىن ايقىندايتىن بولادى، دەپ جازادى شينحۋا.

باعدارلاما بەس نەگىزگى عىلىمي تاقىرىپ بويىنشا 17 باسىم باعىتتان قۇرالعان. ول قىتاي عارىش عىلىمىنىڭ دامۋ ماقساتتارىن، سونداي-اق ءۇش كەزەڭدىك جول كارتاسىن قامتيدى.

- بەس نەگىزگى عىلىمي تاقىرىپقا ەكسترەمالدى عالام، كەڭىستىكتىك- ۋاقىتتىق تولقىندار، كۇن مەن جەردىڭ پلانەتالىق پانوراماسى جانە عارىشتاعى بيولوگيالىق جانە فيزيكالىق عىلىمدار كىرەدى، - دەدى قىتاي عىلىم اكادەمياسىنىڭ ۆيتسە-پرەزيدەنتى دين چيبياو سەيسەنبىدە وتكەن باسپا ءسوز ءماسليحاتىندا.

نەگىزگى تاقىرىپتارعا تۇراقتى دامۋ، كۇن جۇيەسىنىڭ پايدا بولۋى مەن ەۆوليۋتسياسى، پلانەتالىق اتموسفەرانىڭ سيپاتتاماسى، جەردەن تىس تىرشىلىكتى ىزدەۋ جانە ەكزوپلانەتالاردىڭ اشىلۋى جاتادى.

سونىمەن قاتار، باعدارلاما قىتايداعى عارىش عىلىمىن 2050-جىلعا دەيىن دامىتۋدىڭ جول كارتاسىن جاسايدى.

2027 -جىلعا دەيىن سوزىلاتىن ءبىرىنشى كەزەڭدە قىتاي عارىش ستانسياسىن پايدالانۋعا، ايدى يگەرۋدى زەرتتەۋ جوباسىن جانە ايدى زەرتتەۋ باعدارلاماسىنىڭ ءتورتىنشى كەزەڭىن، سونداي-اق پلانەتالاردى زەرتتەۋ جوباسىن جۇزەگە اسىرۋعا نازار اۋدارادى. باعدارلاماعا سايكەس وسى كەزەڭدە عارىشتىق سپۋتنيكتەردىڭ بەستەن سەگىزگە دەيىن عىلىمي ميسسيالارى بەكىتىلەتىن بولادى.

بۇعان دەيىن حابارلاعانىمىزداي، ارحەولوگتار ورتالىق قىتايدىڭ حەنان پروۆينتسياسىندا شامامەن 5 مىڭ جىل تۇرعان نەوليت داۋىرىنە جاتاتىن مولانى تاپتى.

سونداي-اق، قىتايدا جانارماي مەن ديزەل وتىنىنىڭ باعاسى كوتەرىلەتىنى بەلگىلى بولدى.

اۆتور

ەركەجان سماعۇلوۆا