قىرىلعان يتبالىقتاردىڭ كوبى بۋاز بولعان

اقتاۋ. KAZINFORM - قازاقستان رەسپۋبليكاسى گيدروبيولوگيا جانە ەكولوگيا ينستيتۋتىنىڭ وپەراتورى جانە ەكولوگيالىق اعارتۋ جونىندەگى مامانى اسەل بايمۇقانوۆا ماڭعىستاۋ وبلىسىنداعى يتبالىقتاردىڭ ءولىمى بويىنشا الدىن الا ناتيجەلەرىن جاريالادى.

اسەل بايمۇقانوۆانىڭ ايتۋىنشا، ءتۇپقاراعان تۇبەگىنىڭ جاعالاۋىندا 27 -قىركۇيەكتەن 30- قازانعا دەيىن 305 ءولى يتبالىق تابىلعان. 10 ۇشادا (3 پايىز) مەحانيكالىق زاقىم بار. بۇل يتبالىقتار تورلار مەن ارقاندارعا شىرمالىپ، باستارى كەسىلگەن. مۇنداي زاقىمداردىڭ كەيبىرەۋلەرى كەزدەيسوق بولۋى مۇمكىن، قالعاندارى زاڭسىز اۋلاۋدىڭ سالدارى.

- ولگەن يتبالىقتاردىڭ كوبىندە مۇنداي ىزدەر جوق. ءبىزدىڭ قىزمەتكەرلەر ءولىمنىڭ سەبەبىن انىقتاۋعا كومەكتەسەتىن زەرتتەۋلەر ءۇشىن سىنامالار الدى. الايدا، ولەكسەلەردىڭ قاتتى ىدىراۋى تالداۋ جاساۋعا مۇمكىندىك بەرمەدى. الاڭداتاتىنى، زەرتتەلگەن انالىقتاردىڭ جارتىسىنان كوبى بۋاز بولىپ شىقتى. سونداي- اق جاس يتبالىقتار ەكەنى كورىنىپ تۇر. سوندىقتان ءولىم كەنەتتەن بولۋى مۇمكىن، - دەيدى مامان.

اسەل بايمۇقانوۆانىڭ ايتۋىنشا، يتبالىقتار كۇزدە كوبەيۋ ءۇشىن سولتۇستىك كاسپييگە اۋىسادى. ولار تەڭىزدىڭ وسى بولىگىندە شوعىرلانۋ كەزىندە ولگەن.

- ءولىمنىڭ سەبەپتەرى ءارتۇرلى بولۋى مۇمكىن: تابيعي (جەر سىلكىنىسى، تابيعي گازدار شىعارىندىلارى)، تەحنوگەندىك (تەڭىز ۋچاسكەلەرىنىڭ لاستانۋى)، اۋرۋلار (ەپيدەميالار)، - دەيدى ول.

ەگەر ەپيدەميا بولسا، يتبالىقتار جاپپاي ءبىر جەردە ءولۋى ءتيىس. ءبىراق ولەكسەلەر ءار جەردەن تابىلعان.

- جاعدايدى جان- جاقتى زەرتتەۋ ءۇشىن ءارتۇرلى سالا ماماندارى گەولوگتاردىڭ، مۇناي جانە گاز ءوندىرۋ جونىندەگى مامانداردىڭ، ەكولوگتاردىڭ، حيميكتەردىڭ، توكسيكولوگتاردىڭ، ۆيرۋسولوگتاردىڭ جانە باسقالاردىڭ ساراپتاماسى قاجەت. ءبىز بىرگە جۇمىس ىستەۋ ءۇشىن جينالعان بارلىق ماتەريالدى بەرۋگە دايىنبىز. شىعارىندىلار جالعاسۋدا. ارنايى كوميسسيا 4-5 -قاراشا ارالىعىندا تاعى 121 يتبالىقتىڭ ولەكسەسىن تاپتى، - دەپ تولىقتىردى اسەل بايمۇقانوۆا.

بۇعان دەيىن، ەكولوگيا جانە تابيعي رەسۋرستار مينيسترلىگى يتبالىقتارعا قاتىستى العاشقى ساراپتامانىڭ قورىتىندىسىن جاريالاعانى تۋرالى جازعان بولاتىنبىز.

اۆتور

اياگوز ءىزباساروۆا