قىرعىزستاندا وتەتىن دۇنيەجۇزىلىك كوشپەندىلەر ويىندارىندا قازاق كوكپارى بولماي ما

استانا. KAZINFORM - بىرنەشە كۇن بۇرىن قىرعىزستاندا وتەتىن دۇنيەجۇزىلىك كوشپەندىلەر ويىندارى تىزىمىنەن قازاق كوكپارى الىنىپ تاستالدى دەگەن اقپارات تارادى. وسى ورايدا ەلىمىزدىڭ تۋريزم جانە سپورت مينيسترلىگىنە سۇراۋ سالعان ەدىك.

- 2026 -جىلعى قىركۇيەك ايىندا قىرعىزستان رەسپۋبليكاسىندا وتەتىن VI دۇنيەجۇزىلىك كوشپەندىلەر ويىندارى حالىقتار اراسىنداعى مادەني بايلانىستى نىعايتۋعا جانە ەتنيكالىق سپورت تۇرلەرىن جاھاندىق دەڭگەيدە دامىتۋعا جاڭا سەرپىن بەرۋگە باعىتتالعان. بۇگىنگە دەيىن ۇيىمداستىرۋشى تاراپتان VI دۇنيەجۇزىلىك كوشپەندىلەر ويىندارىنىڭ رەسمي ەرەجەسى مەن شاقىرۋ حاتى كەلىپ تۇسكەن جوق، - دەگەن جاۋاپ الدىق رەسمي ساۋالعا.

وسى ورايدا مينيسترلىك قىرعىز رەسپۋبليكاسىنىڭ سپورت جانە دەنە شىنىقتىرۋ ىستەرى جونىندەگى مەملەكەتتىك اگەنتتىگىنە VI دۇنيەجۇزىلىك كوشپەندىلەر ويىندارىن وتكىزۋ ەرەجەسىن جولداۋ جونىندە رەسمي حات جىبەرگەن.

- تۇركيا مەن قازاقستاندا وتكەن سوڭعى ەكى دۇنيەجۇزىلىك كوشپەندىلەر ويىندارىندا كوكپار ويىنى كورەرمەندەر مەن قاتىسۋشىلاردىڭ زور قىزىعۋشىلىعىنا يە بولعانىن اتاپ وتكەن ءجون، - دەلىنگەن حابارلامادا.

سونداي-اق ۆەدومستۆونىڭ حابارلاۋىنشا، قازىر ەلىمىزدە قىرعىزستاندا وتەتىن VI دۇنيەجۇزىلىك كوشپەندىلەر ويىندارىنا قاتىساتىن ۇلتتىق سپورت تۇرلەرى بويىنشا سپورتشىلاردى ىرىكتەۋ ءجۇرىپ جاتىر.

- ۇلتتىق سپورت تۇرلەرىنەن قۇراما كوماندالاردى دايىنداۋ ءۇشىن رەسپۋبليكالىق دەڭگەيدە ۇيلەستىرۋ جۇمىستارىن «ۇلتتىق جانە ات سپورتى تۇرلەرى ورتالىعى» رەسپۋبليكالىق مەملەكەتتىك قازىنالىق كاسىپورنى جۇزەگە اسىرادى، - دەيدى تۋريزم جانە سپورت مينيسترلىگىنەن.

ەسكە سالا كەتسەك، بىلتىر ەلوردادا V دۇنيەجۇزىلىك كوشپەندىلەر ويىندارى ءوتتى.

اۆتور

داۋلەت ىزتىلەۋ