قىرعىزستاندا تەمەكىنى سىرتتان اكەلۋگە ۋاقىتشا تىيىم سالىنادى

بىشكەك. KAZINFORM - قىرعىز رەسپۋبليكاسىنىڭ ەكونوميكا جانە ساۋدا مينيسترلىگى ەۋرازيالىق ەكونوميكالىق وداققا مۇشە ەمەس ەلدەردەن قىرعىزستان اۋماعىنا تەمەكى اكەلۋگە، ترانزيتكە جانە كەرى ەكسپورتتاۋعا التى اي مەرزىمگە تىيىم سالۋدى ۇسىنىپ وتىر. ۇكىمەتتىڭ ءتيىستى قاۋلىسى تالقىلاۋعا شىعارىلدى.

قۇجات قىرعىز رەسپۋبليكاسى ازاماتتارىنىڭ دەنساۋلىعىن كونترافاكتىلىك، سەرتيفيكاتى جوق تەمەكىنى تۇتىنۋدان قورعاۋ، سونداي-اق كونترابانداعا قارسى كۇرەستى كۇشەيتۋ جانە مەملەكەتتىك بيۋدجەتكە تۇسەتىن سالىق تۇسىمدەرىنىڭ بولجامدى كورسەتكىشتەرىن ورىنداۋ ماقساتىندا ازىرلەنگەن.

2023 -جىلى سالىق قىزمەتى زاڭسىز اينالىمنان 65231 قوراپ تەمەكى تاركىلەگەن. 2023 -جىلى قىرعىز رەسپۋبليكاسىندا زاڭسىز تەمەكىنىڭ ۇلەسى 17,7 پايىزدى قۇرادى. Oris, Mondeo, Like جانە Madrid ماركالارىمەن شىعارىلعان كونترافاكتىلىك تەمەكى ونىمدەرى ب ا ءا مەن سەربيادا شىعارىلدى. جوعارىدا اتالعان ماركالار تەحنيكالىق رەگلامەنت سايكەستىگىنە سەرتيفيكاتتاۋدان وتكەن جوق.

ساراپشىلاردىڭ زەرتتەۋلەرىنە سايكەس، قىرعىزستان ورتالىق ازياداعى تەمەكى ونىمدەرىن زاڭسىز اينالىمعا ەنگىزۋدىڭ نەگىزگى ورتالىعى بولىپ قالا بەرەدى. سوڭعى 4 جىلدا باجسىز ساۋدا دۇكەندەرىندە ساتۋعا ارنالعان تەمەكى ونىمدەرىن جەتكىزۋ كولەمى 10 ەسەدەن استام ءوستى. سونىمەن قاتار، 2023-جىلى باجسىز ساۋدا ايماقتارى مەن كەدەندىك قويمالارداعى تەمەكى اينالىمىنىڭ كولەمى 300 ميلليون قوراپ تەمەكىگە جەتتى.

بۇعان دەيىن قىرعىزستاندا ءىرى قارا، ۇساق مال جانە جىلقى مالىن ءۇشىنشى ەلگە ەكسپورتتاۋعا تىركەۋ جانە رۇقسات بەرۋ ۋاقىتشا توقتاتىلعانى تۋرالى جازعان بولاتىنبىز.

اۆتور

زارينا تۋعانبايەۆا