قىرعىزستاندا رەفەرەندۋمعا قاتىساتىن سايلاۋشىلار تىزىمىنە 300 قازاقستاندىق تىركەلدى
استانا. KAZINFORM - قىرعىزستان استاناسىندا قازاقستان رەسپۋبليكاسى ەلشىلىگى جانىنداعى سايلاۋ ۋچاسكەسىندە اەس قۇرىلىسى بويىنشا الداعى رەسپۋبليكالىق رەفەرەندۋمعا قىزۋ دايىندىق جۇمىستارى ءجۇرىپ جاتىر.
№396 رەفەرەندۋم وتكىزۋ جونىندەگى ۋچاسكەلىك سايلاۋ كوميسسياسىنىڭ ءتوراعاسى نۇرلان عىلمانوۆ 6-قازاندا وتەتىن سايلاۋ ۋچاسكەسىنىڭ داۋىس بەرۋگە جوعارى دايىندىعىن اتاپ ءوتتى.
«رەفەرەندۋمعا دايىندىق جۇمىستارى قىزۋ ءجۇرىپ جاتىر. سايلاۋشىلاردىڭ ءتىزىمى بويىنشا 300 قازاقستاندىق تىركەلگەن، ولاردىڭ باسىم بولىگى كونسۋلدىق تىركەۋدە. بۇل تۋرالى سايلاۋشىلار قازاقستان رەسپۋبليكاسىنىڭ قىرعىز رەسپۋبليكاسىنداعى ەلشىلىگىنىڭ رەسمي اقپاراتتىق سايتىندا جانە الەۋمەتتىك جەلىلەردەگى پاراقشالارىندا حابارلاندى. داۋىس بەرۋگە قاتىسۋ ءۇشىن ەلدىڭ جوعارى وقۋ ورىندارىندا وقيتىن قازاقستاندىق ستۋدەنتتەر، سونداي-اق قىزمەتتىك جانە جەكە سەبەپتەرمەن ۋاقىتشا جۇرگەن ازاماتتار تەلەفون ارقىلى رەسمي تۇردە شاقىرىلدى. سايلاۋ ۋچاسكەسى وسك ستاندارتىنا ساي رەفەرەندۋم تۋرالى اقپاراتتىق ستەندتەرمەن جانە باننەرلەرمەن، سونداي-اق داۋىس بەرۋگە ارنالعان جاشىكتەر مەن داۋىس بەرۋگە ارنالعان كابينالارمەن جابدىقتالادى»، - دەدى ول.
بىشكەك قالاسىنداعى شىڭعىس ايتماتوۆ داڭعىلى 95 «ا» مەكەنجايى بويىنشا قازاقستان رەسپۋبليكاسىنىڭ ديپلوماتيالىق وكىلدىگىنىڭ عيماراتىندا ورنالاسقان قىرعىزستانداعى №396-سايلاۋ ۋچاسكەسىندە داۋىس بەرۋ جەرگىلىكتى ۋاقىت بويىنشا ساعات 7:00-دە باستالىپ، 20:00-دە اياقتالادى.
بۇعان دەيىن لوندونداعى سايلاۋ ۋچاسكەسىنىڭ قازاقستانداعى اتوم ەلەكتر ستانساسىن سالۋ جونىندەگى رەفەرەندۋمىنا قالاي دايىندالىپ جاتقانى تۋرالى جازعان بولاتىنبىز.
