قىرعىزستاندا ماس جۇرگىزۋشى كولىكتى سۋعا قۇلاتىپ، 6 بالا كوز جۇمدى

بىشكەك. KAZINFORM - قىرعىزستاندا كولىك توعانعا قۇلاپ، سالونداعى سەگىز بالانىڭ التاۋى سۋعا باتىپ كەتتى، دەپ جازادى 24.kg.

وقيعا كەشە، 20-ماۋسىم كەشكە قارا بالتا اۋىلى ماڭىندا بولعان. Volkswagen Jetta جۇرگىزۋشىسى كولىكتى باسقارا الماي، جولدان شىعىپ توعانعا قۇلاعان.

كولىكتە ءۇش ەرەسەك پەن سەگىز بالا بولعان. ءتورت پەن توعىز جاس ارالىعىنداعى التى بالا سۋعا باتىپ كەتتى. ولاردىڭ ءبارى - ءبىر وتباسىنىڭ مۇشەلەرى.

قارا بالتانىڭ 40 جاستاعى تۇرعىنى ايەلى جانە ءتورت بالاسىمەن بىرگە № 3 توعانعا دەمالۋعا كەلگەن. ولاردىڭ جانىندا ەر ادامنىڭ اپكەسى جانە ونىڭ ءتورت بالاسى - باس-اياعى ءۇش ەرەسەك جانە سەگىز بالا بولعان.

دەمالىستان قايتىپ كەلە جاتقاندا جۇرگىزۋشى كولىك رۋلىنە يە بولا الماي، سۋعا قۇلايدى. كولىك جۇرگىزگەن ادام ماس بولعان.

جۇرگىزۋشى، ونىڭ ايەلى، ءۇش ايلىق قىزى، ەر ادامنىڭ اپكەسى جانە ونىڭ جەتى جاسار قىزى امان قالدى. ولار اۋرۋحاناعا جەتكىزىلدى.

سوت-قۇقىقتىق ساراپتاما تاعايىندالدى. تەرگەۋ اياسىندا جۇرگىزۋشى ۇستالدى.

شۋ وبلىسىنىڭ ىشكى ىستەر باسقارماسى جۇرگىزۋشىنىڭ بالالاردى «شومىلۋعا بولمايدى» دەگەن بەلگىسى بار جەرگە اكەلىپ، ونىمەن قويماي ماس بولىپ كولىككە وتىرعانىن، وسى جاعداي ولاردىڭ ولىمىنە اكەلگەنىن حابارلادى.

ەر ادام قاماۋدا وتىر. تەرگەۋ جالعاسۋدا.

اۆتور

جانات قاپالبايەۆا