قىرعىزستاندا كولىك سالىعى جوق، جەر سالىعىنىڭ موراتوريى 2030 -جىلعا دەيىن ۇزاردى
استانا. KAZINFORM - قىرعىز رەسپۋبليكاسىنىڭ پرەزيدەنتى سادىر جاپاروۆ سالىق جۇيەسىن رەفورمالاۋعا باعىتتالعان جارلىققا قول قويعانىن ءمالىم ەتتى.
- قۇرمەتتى قىرعىزستاندىقتار! مەن سالىققا بايلانىستى جارلىققا قول قويدىم. قاراپايىم ازاماتتارعا ۇعىنىقتى بولۋ ءۇشىن ونىڭ مازمۇنىن ءتۇسىندىرىپ بەرەيىن. مەن اۆتوكولىككە سالىناتىن سالىقتى تولىقتاي الىپ تاستاۋ تۋرالى تاپسىرما بەردىم جانە ءتيىستى جارلىققا قول قويدىم.
بۇل شەشىم «جول قورى تۋرالى» زاڭنىڭ كۇشىنە ەنۋىمەن بايلانىستى. اتالمىش قۇجات جانارمايدىڭ ءار ليترىنەن 1 سوم الىم الۋدى كوزدەيدى. كولىك قۇرالدارىنان سالىق الىنبايدى.
ونىڭ ورنىنا 1-قاڭتاردان باستاپ كولىككە قۇيىلعان بەنزين مەن ديزەلدىڭ ءار ليترىنەن 1 سوم الىنادى، - دەپ جازدى قىرعىز باسشىسى Facebook-تەگى پاراقشاسىندا.
سونداي- اق ول 2025 -جىلدىڭ 1- قاڭتارىنا دەيىن اۆتوكولىك سالىعىن تولەپ ۇلگەرمەگەندەرگە راقىمشىلىق جاسالاتىنىن ءمالىم ەتتى.
- ونداي سالىق تولەۋشىلەر ايتارلىقتاي كوپ بولىپ شىقتى. مەملەكەتكە اۋىرتپالىق تۋدىراتىنىنا قاراماستان، وسىنداي شەشىم قابىلدادىق.
سونداي- اق ءبىز زاڭدى تۇلعالار مەن جەكە كاسىپكەرلەردىڭ 2022 -جىلدىڭ 1- قاڭتارىنا دەيىن جينالىپ قالعان سالىق قارىزىن كەشىردىك. (2022 -جىلدىڭ 1- قاڭتارىنا دەيىنگە كەزەڭدەگى سالىق تولەمدەرى تەكسەرىلمەيدى)، - دەپ جازادى سادىر جاپاروۆ.
ەل پرەزيدەنتى فەرمەرلەردى جەر سالىعىنان بوساتۋ تۋرالى موراتوريدى 2030 -جىلعا دەيىن ۇزارتقانىن ءمالىم ەتتى.
- 2030 -جىلعا دەيىن جەر سۋارۋ ماسەلەسىن شەشەمىز. نەگىزگى جانە قوسالقى سۋارۋ ارنالارىن سالىپ، قولدا بارىن ارشىپ، تازارتامىز. جالپى فەرمەرلەردىڭ سۋ ماسەلەسىن شەشەمىز. وسىدان كەيىن بارىپ قايتادان سالىپ جيناۋدى باستايمىز. ءبىراق مەملەكەتتى سالىقتىڭ ارقاسىندا ۇستاپ، نىعايتۋعا بولاتىنىن ەستەرىڭىزگە سالامىن، - دەپ جازادى كورشى ەلدىڭ پرەزيدەنتى.
ايتا كەتەيىك، قىرعىزستاندا جەمقورلىققا قارسى جازا كۇشەيتىلدى.
ەسىمجان ناقتىباي
اۆتور
