قىرعىزستاندا ءدىن تۋرالى زاڭعا قول قويىلدى

استانا. KAZINFORM - زاڭدا ءبىر عانا داۋلى ماسەلە بار - ءۇي ارالاپ ۋاعىز ايتۋ ماسەلەسىنىڭ رەتتەلمەگەندىگى، دەپ حابارلايدى Kazinform ءتىلشىسى.

Садыр Жапаров
Фото: Султан Досалиев / пресс-служба президента КР

مەملەكەت باسشىسى سادىر جاپاروۆ Facebook پاراقشاسىندا ءوز شەشىمىن ءتۇسىندىردى.

ونىڭ ايتۋىنشا، دىنگە بەرىك ازاماتتار زاڭعا قارسىلىق ءبىلدىرىپ، قابىلداماۋدى سۇراعان. الايدا زايىرلى كوزقاراستاعى ازاماتتار زاڭعا قول قويۋدى تالاپ ەتكەن.

- ەلىمىزدە ءدىندى ۇستاناتىندار قانشا بولسا، زايىرلى كوزقاراستاعى ازاماتتار دا كوپ ەكەنىن ۇمىتپايىق. ولار بەيتانىس ادامداردىڭ پاتەرلەر مەن ۇيلەردى ارالاپ، ەسىك قاعۋىنا قارسى. حالىق بۇل ۋاعىزشىلار كىمدەر، ولاردا ءمۇفتياتتان، قازياتتان نەمەسە حاتيبياتتان كۋالىك بار ما، ولار قانداي ۇيىم نەمەسە قانداي باعىتتى ناسيحاتتايدى، بۇل باعىت دىنىمىزگە قايشى كەلمەي مە ؟ دەگەن ساۋالدارعا جاۋاپ العىسى كەلەدى، - دەپ ءتۇسىندىردى قىرعىز ەلىنىڭ باسشىسى.

سادىر جاپاروۆ زاڭدا داۋلى ءبىر عانا جايت بار، ول - ۋاعىز ايتۋ ءۇشىن ۇيلەردى ارالاۋ ماسەلەسى دۇرىس رەتتەلمەگەنىن باسا ايتتى.

- مۇنداي ۋاعىز تاراتۋعا كىم رۇقسات بەرەتىنى، وعان كىم قاتىسا الادى، قانداي ءبىلىم قاجەت، كىمنىڭ داۋات وتكىزۋگە قۇقىعى بار، قانداي پاراقشالار نەمەسە كىتاپتار تاراتۋعا رۇقسات ەتىلگەنى جانە بۇل ماتەريالداردى كىم تەكسەرەتىنى انىقتالماعان. ازاماتتارىمىز وتباسىن، بالا-شاعاسىن قاراۋسىز، كۇنكورىسسىز قالدىرىپ، 3 كۇن، 40 كۇن، ءتىپتى 4 ايعا كەتىپ قالعان جاعدايلار دا بار. اۋەلى وتباسىڭدى از بولسا دا ازىق-تۇلىكپەن قامتاماسىز ەتىپ، سوسىن بارىپ دىنگە شاقىرۋ كەرەك ەمەس پە؟ - دەپ جازدى قىرعىز باسشىسى.

مەملەكەت باسشىسى سوڭعى كەزدەرى قىرعىزستاندا تەرىس اعىمداردى ناسيحاتتايتىن راديكالدى ماتەريالدار مەن كىتاپتاردى تاراتۋ فاكتىلەرى جيىلەپ كەتكەنىن اتاپ ءوتتى. ونىڭ ويىنشا، ءمۇفتيات پەن عۇلامالار كەڭەسى ناقتى تالاپتار مەن ەرەجەلەر بەلگىلەپ، ۇسىنۋى كەرەك.

- ەگەر ءمۇفتيات ناقتى ەرەجەلەر ازىرلەپ، وسى پروتسەستى رەتكە كەلتىرىپ، ودان كەيىن ۋاعىز ايتۋدى جالعاستىرسا، بۇل مەملەكەتىمىزدىڭ بولاشاعىنا يگى بولادى، - دەدى مەملەكەت باسشىسى.

قىرعىزستان حالقى 33 اعىمعا بولىنگەنى اتالىپ ءوتتى. ەلدە سوت تىيىم سالعان، ءبىراق جۇمىس ىستەپ جاتقان اعىمدار بار:

حيزبۋت- تاحرير- ءال- يسلامي؛

ات- تاكفير ۆال- حيدجرا؛

ياكىن ينكار؛

دجابحات ان- نۋسرا (سيريا اۋماعىنا كەتتى)؛

كاتيبات ءال-يمام ءال-بۋحاري (سيريا اۋماعىنا كەتتى)؛

جاننات وشيكلاري (سيريا اۋماعىنا كەتتى).

قىرعىزستان سوتىنىڭ شەشىمىمەن قىزمەتىنە تىيىم سالىنعان جانە ەل اۋماعىندا توقتاتىلعان ەكسترەميستىك نەمەسە تەرروريستىك ۇيىمدار:

ءال- قايدا؛

شىعىس تۇركىستان يسلام قوزعالىسى؛

كۇرد حالىق كونگرەسى؛

شىعىس تۇركىستان ازاتتىق ۇيىمى؛

تۇركىستان يسلام پارتياسى؛

اي شىركەۋى؛

دجايشۋل ماحدي؛

دجۋند ءال- حاليفا؛

انسارۋللا؛

اكروميا؛

سايد بۋرياتسكيدىڭ ۇگىت-ناسيحات ماتەريالدارى مەن قىزمەتى (ا. تيحوميروۆ)؛

دايش - يراك پەن ليەۆانت يسلام مەملەكەتى؛

جاماات ات- تاۋحيد ءۋال- جيحاد؛

جيھاد ۇيىمى.

قىزمەتىنە سوت تىيىم سالماعان اعىمدار:

تابليعي جاماعات؛

سالافيا؛

حيزمەت (گۇلەنشىلەر)؛

نۋردجۋلار؛

سۋلايمانشىلار؛

احماديا؛

قۇرانيستەر (قۇران ءاھلۋ)؛

«مۇسىلمان باۋىرلار»؛

جەتىنشى كۇن ادۆەنتيستەرى؛

يەگوۆا كۋاگەرلەرى؛

پروتەستانتتار؛

يسا ءماسىح شىركەۋى؛

ساەنتولوگتار؛

تاڭىرشىلدەر.

سادىر جاپاروۆتىڭ ايتۋىنشا، بۇل اعىمداردى ۇستانۋشىلار سانى كۇن سايىن ارتىپ كەلەدى.

- تىيىم سالىنباعان قوزعالىستار ءتۇرلى كىتاپتار مەن بروشيۋرالاردى تاراتادى. سونداي-اق تىيىم سالىنعان اعىمدار كىتاپتار، پاراقشالار مەن بەينەروليكتەر تاراتادى. كەيبىر جوسىقسىز ۇيىمدار ازاماتتارىمىزدى جاسىرىن تۇردە تەرىس اعىمدارعا تارتىپ ءجۇر. بۇل بولاشاعىمىزعا قاۋىپ توندىرەتىن اسا قاۋىپتى ءۇردىس. مۇسىلمان ەلدەرىندە، مىسالى، سيريادا جانە باسقالارىندا مۇسىلمانداردىڭ وزدەرى ءبىر-بىرىمەن: «مەنىڭ ۇيىمىم دۇرىس، ال ءسىزدىڭ اعىمىڭىز دۇرىس ەمەس» دەپ ءبىر-بىرىمەن سوعىساتىنىن كورىپ وتىرمىز. ونىمەن كۇرەس ميلليونداعان مۇسىلمانداردىڭ قانىن توگىپ جاتىر، - دەپ ءتۇسىندىردى ول.

مەملەكەت باسشىسى ءمۇفتيات پەن ءدىنتانۋشىلارعا ءدىن سالاسىن رەتكە كەلتىرۋگە ىقپال ەتۋدى سۇرادى.

- قىرعىزستاندى دۇرىس جولعا سالىپ، ونىڭ بولاشاعىنا بەرىك نەگىز قالايىق. ەل ارالاۋ ماسەلەسىنە بۇگە-شىگەسىنە دەيىن تالقىلاپ، ءتارتىبىن ۇسىنىڭىزدار. ولاردىڭ مۇلتىكسىز ورىندالۋى مەن رەتتەلۋىنە مەملەكەت كومەكتەسەدى. ۇسىنىستارىڭىزدى نەعۇرلىم تەز ەنگىزسەڭىزدەر، سوعۇرلىم جاقسى، - دەپ تۇيىندەدى ءسوزىن قىرعىزستان باسشىسى.

وسىعان دەيىن قىرعىزستاندا ءبىر مانداتتى وكرۋگتەر بويىنشا دەپۋتاتتار سايلاۋىن وتكىزبەۋ ۇسىنىلىپ وتىرعانىن جازعان ەدىك.

اۆتور

ەركەجان سماعۇلوۆا

سوڭعى جاڭالىقتار