قىرعىزستاندا ءانۇراننىڭ جاڭا نۇسقاسىنا مۋزىكا جازۋعا بايقاۋ جاريالاندى
استانا. KAZINFORM - مەملەكەتتىك ءانۇراننىڭ جاڭا رەداكسياسىنا مۋزىكا جازۋعا ارنالعان كونكۋرس جاريالاندى.
بۇل جونىندە قىرعىز رەسپۋبليكاسىنىڭ مادەنيەت، اقپارات، سپورت جانە جاستار ساياساتى مينيسترلىگى حابارلادى.
ۆەدومستۆونىڭ مالىمدەۋىنشە، ءانۇران ءماتىنى مەن مۋزىكاسىن جاڭارتۋ ماسەلەسىنە ارنالعان ۆەدومستۆوارالىق كوميسسيانىڭ ءتورتىنشى وتىرىسىندا 16- ماۋسىم مەن 17- شىلدە ارالىعىندا قابىلدانعان 132 ۇسىنىستىڭ ىشىنەن بەس ءماتىن ىرىكتەلىپ الىنعان.
كونكۋرستىڭ ەكىنشى كەزەڭىندە كومپوزيتورلار، مۋزىكانتتار جانە ورىنداۋشىلار وسى بەس ءماتىننىڭ بىرىنە سايكەس كەلەتىن مۋزىكالىق نۇسقالارىن ۇسىنا الادى. مۋزىكالىق ۇسىنىستاردى قابىلداۋ بيىلعى 8 -قىركۇيەككە دەيىن جالعاسادى.
قاتىسۋشىلار ءوز ماتەريالدارىن كەلەسى مەكەنجايعا جولداۋى قاجەت: بىشكەك قالاسى، پۋشكين كوشەسى، 8- ءۇي، قىرعىز رەسپۋبليكاسىنىڭ مادەنيەت، اقپارات، سپورت جانە جاستار ساياساتى مينيسترلىگى.
- ىرىكتەۋ ناتيجەسى بويىنشا كوميسسيا ءۇش ۇزدىك نۇسقانى (ءماتىن مەن مۋزىكا) جوگوركۋ كەنەشتىڭ قاراۋىنا ۇسىنادى، - دەلىنگەن حابارلامادا.
ايتا كەتەلىك قىرعىزستاندا تۋريستەر سانى وسكەنىمەن قىزمەت كورسەتۋ سالاسى ارتتا قالىپ وتىرعانى تۋرالى جازعان ەدىك.
