قىرعىزستاندا اسكەري قىزمەتكەرلەردىڭ جالاقىسى كوتەرىلەدى

استانا. KAZINFORM - قىرعىزستاندا 1- شىلدەدەن باستاپ كۇش قۇرىلىمدارى وفيتسەرلەرىنىڭ جالاقىسى كوتەرىلەدى.

بۇل تۋرالى قىرعىز رەسپۋبليكاسىنىڭ پرەزيدەنتى سادىر جاپاروۆ ۇلى جەڭىستىڭ 80 جىلدىعىن مەرەكەلەۋ قۇرمەتىنە ءسوز سويلەۋى كەزىندە ايتتى.

قىرعىزستان باسشىسىنىڭ ايتۋىنشا، 1- شىلدەدەن باستاپ كۇش قۇرىلىمدارى وفيتسەرلەرىنىڭ جالاقىسى ورتا ەسەپپەن %35- عا ارتادى، ال 1 -قاراشادان باستاپ كەلىسىمشارت بويىنشا قىزمەت اتقارىپ جۇرگەن اسكەري قىزمەتشىلەردىڭ جالاقىسى وسىنشاما وسەدى.

- بيىلعى جىلدىڭ باسىنان اسكەري قىزمەتكەرلەردىڭ وتباسىلارى قوعامدا وزدەرىن سەنىمدى ءارى ابىرويلى سەزىنۋى ءۇشىن اسكەري قىزمەتشىلەر مەن قۇقىق قورعاۋ ورگاندارى قىزمەتكەرلەرىنىڭ جالاقىسى، سونداي-اق ۋاقىتشا تۇرعىن ءۇيدى جالعا العانى ءۇشىن اقشالاي وتەماقى مولشەرى ارتتىرىلدى. اعىمداعى جىلدىڭ 1- شىلدەسىنەن باستاپ كۇش قۇرىلىمدارى قىزمەتكەرلەرىنىڭ جالاقىسى ورتا ەسەپپەن 35 پايىزعا ارتادى، ال 1-قاراشادان باستاپ كەلىسىمشارت بويىنشا قىزمەت ەتەتىن اسكەري قىزمەتشىلەردىڭ جالاقىسى دا وسىنشاما مولشەردە وسەدى، - دەدى ول.

بۇعان دەيىن قىرعىزستاندا ارنايى ينۆەستيتسيالىق اۋماق قۇرىلاتىنىن جازعان بولاتىنبىز.

اۆتور

زارينا تۋعانبايەۆا