قىرعىزستان مەن وزبەكستان زەينەتاقى ءوتىلىن ءوزارا مويىنداۋعا كەلىستى

استانا. KAZINFORM - قىرعىز رەسپۋبليكاسىنىڭ الەۋمەتتىك قورى مەن وزبەكستان رەسپۋبليكاسىنىڭ مەملەكەتتىك ەمەس زەينەتاقى قورى مەملەكەتتىك الەۋمەتتىك ساقتاندىرۋ جانە زەينەتاقىمەن قامسىزداندىرۋ تۋرالى كەلىسىم جوباسىن ماقۇلدادى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

ق ر الەۋمەتتىك قورىنىڭ دەرەگىنشە، قىرعىزستان مەن وزبەكستان ازاماتتارى ساقتاندىرۋ جانە مەملەكەتتىك زەينەتاقىلاردى قوسارلانعان ساقتاندىرۋ جارنالارىن تولەمەي-اق تەڭ قۇقىقپەن الاتىن بولادى.

كەلىسىمدە مىناداي نورمالار قاراستىرىلعان:

زەينەتاقى تاعايىنداۋ ءۇشىن ساقتاندىرۋ ءوتىلىن قوسۋ؛

ازاماتتارعا زەينەتاقىنى ولاردىڭ تۇرىپ جاتقان ەلىنە قاراماستان تىكەلەي تولەۋ، جەتكىزۋ شىعىندارىن ۇستاماي جۇزەگە اسىرۋ؛

قوسارلانعان اۋدارىمدارعا جول بەرمەۋ ءۇشىن ءىسساپارلار مەن مەرزىمدى ۇزارتۋعا قاتىستى ەرەجەلەر ەنگىزۋ.

اتالعان كەلىسىمنىڭ جۇزەگە اسىرىلۋى ەكىجاقتى قاتىناستاردى نىعايتىپ قانا قويماي، الەۋمەتتىك جانە ەكونوميكالىق ىنتىماقتاستىققا قوسىمشا مۇمكىندىك بەرەدى. ونىڭ ىشىندە ءىرى ينفراقۇرىلىمدىق جوبالار اياسىنداعى سەرىكتەستىكتى دامىتۋعا جول اشادى.

بۇعان دەيىن قىرعىزستاننىڭ ءىرى ينۆەستورلارعا جاعدايدى جەڭىلدەتەتىنى حابارلانعان بولاتىن.