قورعانىس ءمينيسترى: باستىسى - ەكيپاجدىڭ جايىن انىقتاۋ ءارى تۋىستارىنا قولداۋ كورسەتۋ
استانا. KAZINFORM - قازاقستان رەسپۋبليكاسىنىڭ قورعانىس ءمينيسترى اۆياتسيا گەنەرال-لەيتەنانتى داۋرەن قوسانوۆ جوعالعان اۋە قورعانىسى كۇشتەرىنىڭ EC-145 تىكۇشاعىن ىزدەۋ جۇمىستارىنىڭ بارىسىمەن جەكە تانىستى. بۇل تۋرالى ۆەدومستۆونىڭ باسپا ءسوز قىزمەتى ءمالىم ەتتى.
اسكەري-اۋە كۇشتەرىنىڭ قولباسشىسى اۆياتسيا گەنەرال-مايورى اسقار ءىزباسوۆ قورعانىس ۆەدومستۆوسىنىڭ باسشىسىن سوربۇلاق كولىندەگى ىزدەستىرۋ جۇمىستارىنىڭ بارىسىنان حاباردار ەتتى، ونداعى تابيعي جانە تەحنوگەندىك ەرەكشەلىكتەر بارىنشا تەحنيكالىق جاراقتاندىرۋدى جانە وپەراتسياعا قاتىسۋشىلاردىڭ ءىس-قيمىلدارىن ناقتى ۇيلەستىرۋدى تالاپ ەتەدى.
- ىزدەۋ جۇمىستارىنا سۋ استى رەلەفى مەن ءتۇبىنىڭ شوگىندى، تەرەڭدىگىنىڭ وزگەرمەلى جانە سۋدىڭ لاي بولۋى كەدەرگى كەلتىرۋدە. الايدا، 25 شىلدەدە جوعالىپ كەتكەن اۋە قورعانىس كۇشتەرى EC-145 تىكۇشاعىنىڭ بورتىندا بولعانداردىڭ قاي جەردە ەكەنىن انىقتاۋ بويىنشا اۋقىمدى ىزدەۋ- قۇتقارۋ وپەراتسياسى كۇندىز دە، تۇندە دە توقتامايدى، - دەدى اسكەري-اۋە كۇشتەرىنىڭ قولباسشىسى.
سول ىزدەۋ ءجۇرىپ جاتقان ايماقتا اۆياتسيا گەنەرال- لەيتەنانتى داۋرەن قوسانوۆ جوعالعان ۇشقىشتاردىڭ تۋىستارىمەن كەزدەستى. مينيستر ولارعا قولداۋ ءبىلدىرىپ، وپەراتسيا تاۋلىك بويى جالعاساتىنىن، بارلىق رەسۋرستار جۇمىلدىرىلعانىن جانە اسكەريلەر جولداستارىن تابۋ ءۇشىن قولدان كەلگەننىڭ ءبارىن جاسايتىنىن ايتتى.
- ءبىز سوڭىنا دەيىن ارەكەت ەتىپ، ىزدەۋدى جالعاستىرامىز. جاقىن تۋىستارىنا جان-جاقتى قولداۋ كورسەتىلەدى، كۇن سايىن بايلانىستامىز. قايعىلى جاعدايدىڭ سەبەپتەرىن انىقتاۋ جانە جوعالعانداردى تابۋ ءۇشىن بار كۇشىمىزدى سالامىز، - دەدى قورعانىس ءمينيسترى.
ۇيسەنباي نۇرجىگىت تىكۇشاق ەكيپاجى كومانديرىنىڭ ۇلكەن اعاسى مەدەت ەرجىگىتتىڭ ايتۋىنشا، تاڭەرتەڭنەن كەشكە دەيىن ۇشقىشتاردىڭ تۋىستارى جەدەل شتاب ورنالاستىرىلعان ىزدەۋ ورنىندا ءجۇر. ولار ىزدەۋ توبىنىڭ قۇرامىندا سوربۇلاق كولىن اينالىپ ءوتىپ، اۋەدەن تىكۇشاقتىڭ سۋ تۇبىنەن كورۋ مۇمكىن ەمەستىگىنە كوز جەتكىزدى.
ىزدەستىرۋ وپەراتسياسىنا 400 دەن استام ادام، كينولوگيالىق توپتار، 70 تەن استام جەرۇستى تەحنيكاسى، 21 ءجۇزۋ قۇرالى، 10 ۇ ۇ ا، ەحولوتتار، سۋاستى سكانەرلەۋ قۇرالدارى جۇمىلدىرىلعان.
ەسكە سالساق، 25-شىلدەدە الماتى وبلىسىندا جوسپارلى ۇشۋ بارىسىندا قازاقستان رەسپۋبليكاسى قارۋلى كۇشتەرى اۋە قورعانىسى كۇشتەرىنىڭ EC-145 تىكۇشاعى راداردان جوعالىپ كەتتى.
جوسپارلى ۇشىپ ءوتۋ كەزىندە جوعالعان اۋە قورعانىسى كۇشتەرىنىڭ EC-145 تىكۇشاعىندا بولعان ادامداردىڭ ورنىن انىقتاۋ ماقساتىندا سوربۇلاق سۋ قويماسى اۋدانىندا اۋقىمدى ىزدەستىرۋ- قۇتقارۋ وپەراتسياسى تاۋلىك بويى جانە كۇشەيتىلگەن رەجيمدە جۇرگىزىلىپ جاتىر.
قۇتقارۋ وپەراتسياسىنا قوسىمشا 5 اسكەري ءبولىمنىڭ كۇش-قۇرالدارى تارتىلدى.
