قونايەۆتا حالىق سانى ازايعان: اكىمدىك سەبەبىن ءتۇسىندىردى
قونايەۆ. KAZINFORM - قونايەۆ قالاسىنىڭ اكىمدىگى ءبىر جىلدا شاھار حالقىنىڭ سانى 8,2 پايىزعا ازايىپ، 65900 تۇرعىن بولعانى تۋرالى مالىمەتكە بايلانىستى مالىمدەمە جاسادى.
ءبىرىنشى كرەديتتىك بيۋرو ۇلتتىق ستاتيستيكا بيۋروسىنىڭ مالىمەتى نەگىزىندە وڭىرلەر اراسىندا حالىق سانى ەڭ كوپ ازايعان شاھار رەتىندە قونايەۆ قالاسىن كورسەتكەن.
قونايەۆ قالاسىنىڭ اكىمدىگى شاھارداعى ادام سانى تىكەلەي ازايماعانىن، تەك اكىمشىلىك ءبولىنىس اسەرىنەن قىسقارعانىن ءتۇسىندىردى.
- 2024-جىلدىڭ 9-قاڭتارىندا الاتاۋ قالاسى قۇرىلدى. وعان قونايەۆ قالاسى اۋماعىنداعى زارەچنىي، ارنا اۋىلدارى تولىعىمەن ەنگىزىلدى. سايكەسىنشە، قالا حالقىنىڭ سانى ازايدى. 2023-جىلى قونايەۆ تۇرعىندارىنىڭ سانى 70512 بولسا، 2024-جىلى بۇل كورسەتكىش 65024 كە تومەندەگەن. الايدا، حالىق سانى قايتا ءوسىپ كەلە جاتىر. قازىرگى كورسەتكىش 65934 ءتى قۇراپ وتىر. سول ءۇشىن حالىق اراسىندا «وبلىس ورتالىعى ءومىر سۇرۋگە قولايسىز قالا» دەگەن جاڭساق پىكىر تۋدىرماۋلارىڭىزدى سۇرايمىز، - دەپ جازدى اكىمدىك.
ەسكە سالايىق، بۇعان دەيىن قونايەۆتا تازالىق ساقتاماعان تۇرعىندارعا 3 ميلليون تەڭگە ايىپپۇل سالىنعانىن جازعانبىز.
