قوجا احمەت ياساۋي كەسەنەسى ماڭىندا قۇرىلىس توقتار ەمەس - مينيستر يۋنەسكو نىساندارىنىڭ ساقتالۋى تۋرالى

استانا. KAZINFORM - ەلىمىزدە يۋنەسكو كونۆەنسيالارى مەن ۇسىنىمدارى بويىنشا مىندەتتەمەلەر تولىق ورىندالماي وتىر. مادەنيەت جانە اقپارات ءمينيسترى ايدا بالايەۆا يۋنەسكو اياسىندا مادەني مۇرانى ساقتاۋ جانە ىلگەرىلەتۋ ماسەلەسىن كوتەردى.

- بۇگىندە ەلىمىزدە تاريحي-مادەني مۇرا وبەكتىلەرىنىڭ سانى 25 مىڭنان اسادى. اتاپ ايتقاندا رەسپۋبليكالىق ماڭىزى بار تاريحي جانە مادەني ەسكەرتكىشتەر تىزىمىندە 265 ەسكەرتكىش بولسا، جەرگىلىكتى ماڭىزى بار 12 مىڭنان اسا تاريحي جانە مادەني ەسكەرتكىش تىركەلدى. يۋنەسكو-نىڭ بۇكىل الەمدىك مۇرا تىزىمىندە ەلىمىزدىڭ 10 تاريح جانە مادەني ەسكەرتكىشى بار، - دەدى دەدى مادەنيەت ءمينيسترى ۇكىمەتتىڭ بۇگىنگى وتىرىسىندا.

سونىمەن بىرگە، مينيسترلىك ماتەريالدىق ەمەس مادەني مۇرا ەلەمەنتتەرىنىڭ ۇلتتىق ءتىزىمىن قايتا قاراپ، بۇعان دەيىنگى 45 ەلەمەنتتى 79 ەلەمەنتكە دەيىن ارتتىردى. قازىر قازاقستاننىڭ اتىنان ادامزاتتىڭ ماتەريالدىق ەمەس مادەني مۇراسى تىزىمىنە 14 ەلەمەنت ەنگىزىلگەن.

بۇل رەتتە يۋنەسكو ستاندارتتارىنا ساي مادەني جانە قۇجاتتىق مۇرانى ساقتاۋ مەن دامىتۋعا كەدەرگى كەلتىرەتىن ءبىرقاتار ماسەلە انىقتالعان.

- بىرىنشىدەن، قازىر يۋنەسكو كونۆەنسيالارى مەن ۇسىنىمدارى بويىنشا مىندەتتەمەلەر تولىق ورىندالماي وتىر. الماتى وبلىسىنداعى تالعار مەن قارامەرگەن، جەتىسۋ وبلىسىنداعى قويلىق، جامبىل وبلىسىنداعى اقتوبە، قۇلان، قوستوبە جانە ورنەك سەكىلدى قالاشىقتاردىڭ، اقىرتاس سارايى كەشەنىنىڭ ينفراقۇرىلىمدارىن دامىتۋ - وتە وزەكتى، − دەيدى ا. بالايەۆا.

ونىڭ ايتۋىنشا، يۋنەسكو تىزىمىنە ەنگەن ءبىرقاتار ەسكەرتكىش كوپ جاعدايدا «قاراۋسىز قالعان»، نە بولماسا «ماڭىزسىز» نىساندار رەتىندە قابىلدانىپ وتىر.

حالىقارالىق ماڭىزى بار ەسكەرتكىشتەر وبلىستاردىڭ اۋماعىندا ورنالاسقاندىقتان، ولاردى دامىتۋ اكىمدىكتەر ءۇشىن مۇددەلى ماقسات بولۋى كەرەك.

− ال قوجا احمەت ياساۋي كەسەنەسى سەكىلدى بۇكىل الەمدىك مۇرا نىسانىنىڭ بۋفەرلىك ايماعىندا جەرگىلىكتى بيلىكتىڭ كەلىسىلمەگەن قۇرىلىس سالۋى توقتار ەمەس. ماسەلەن، قازىر ەسكەرتكىشتىڭ بۋفەرلىك ايماعىندا تاعى ءبىر قۇرىلىس ىرگەتاسى قالانعانى بەلگىلى بولدى. سونداي-اق، قۇلان، قويلىق قالاشىقتارىنىڭ بۋفەرلىك ايماعىندا قۇرىلىس وبەكتىلەرى كوبەيىپ، اينالاسىنداعى قوقىستىڭ تازارماۋى دا وزەكتى ماسەلەگە اينالعان. رەسپۋبليكالىق ماڭىزى بار تەكتۇرماس، جوشى حان كەسەنەلەرىنىڭ جاي-كۇيى دە ءجىتى نازار اۋدارۋدى قاجەت ەتەدى، − دەدى ايدا بالايەۆا.

اۆتور

ايجان سەرىكجان قىزى