قوعامدىق ورىنداردا قايتادان بەتپەردە تاعۋ رەجيمى ەنگىزىلدى
استانا. KAZINFORM - قازاقستاندىقتارعا كوروناۆيرۋس ينفەكسياسى مەن قىزىلشانىڭ الدىن الۋ ماقساتىندا تاعى دا ماسكا تاعۋ ۇسىنىلادى. باس مەملەكەتتىك سانيتارلىق دارىگەر ايجان ەسماعامبەتوۆا اۋا-تامشى جولىمەن بەرىلەتىن جۇقپالى اۋرۋلاردىڭ الدىن الۋ شارالارىن كۇشەيتۋ تۋرالى ءتيىستى قاۋلىعا قول قويدى.
وبلىستاردىڭ، الماتى، استانا، شىمكەنت قالالارىنىڭ دەنساۋلىق ساقتاۋ باسقارمالارىنىڭ، سانيتاريالىق-ەپيدەميولوگيالىق باقىلاۋ كوميتەتىنىڭ اۋماقتىق دەپارتامەنتتەرىنىڭ باسشىلارىنا مەديتسينالىق ۇيىمداردا پەرسونال مەن كەلۋشىلەردىڭ مەديتسينالىق ماسكالاردى قولدانۋى، انتيسەپتيكتەردىڭ بولۋى، COVID-19 كوروناۆيرۋس ينفەكسياسىنىڭ، تۇماۋدىڭ جانە ج ر ۆ ي الدىن الۋ شارالارى تۋرالى حالىق اراسىندا اقپاراتتىق-ءتۇسىندىرۋ جۇمىستارىن جۇرگىزۋ تاپسىرىلدى.
«وبلىستاردىڭ، الماتى، استانا، شىمكەنت قالالارىنىڭ جەرگىلىكتى اتقارۋشى ورگاندارىنا، ورتالىق مەملەكەتتىك ورگاندارعا، مەنشىك نىسانىنا قاراماستان جەكە جانە زاڭدى تۇلعالارعا، حالىق كوپ جينالاتىن ورىنداردا (اۋەجايلار، تەمىرجول ۆوكزالدارى، اۆتوۆوكزالدار، بازارلار، ساۋدا- ويىن-ساۋىق ورتالىقتارى، ساۋدا ۇيلەرى، تەاترلار، كينوتەاترلار، ح ق ك و)، كولىكتىڭ بارلىق تۇرلەرىندە (قوعامدىق كولىك، اۋە، تەمىرجول) مەديتسينالىق نەمەسە ماتا ماسكالارىن پايدالانۋدى ۇسىنۋ تاپسىرىلدى»، - دەلىنگەن قاۋلىدا.
قاۋلى بۇگىن كۇشىنە ەندى.
اۆتور
ايجان سەرىكجان قىزى
