قۇرىلتايدا ەتيكانى بۇزعاندارعا قانداي شارا قولدانىلادى
استانا. KAZINFORM - دەپۋتاتتىق ادەپ قاعيدالارىن ساقتاماعاندار سۇراق قويۋ، ساۋال جولداۋ ءتارىزدى مۇمكىندىكتەرىنەن ۋاقىتشا ايرىلادى. بۇل جونىندە ق ر پارلامەنتى ءماجىلىسىنىڭ دەپۋتاتى ايدوس سارىم مالىمدەدى.
ونىڭ سوزىنشە، «قازاقستان رەسپۋبليكاسىنىڭ قۇرىلتايى جانە ونىڭ دەپۋتاتتارىنىڭ مارتەبەسى تۋرالى» كونستيتۋتسيالىق زاڭ جوباسىندا دەپۋتاتتىق ادەپ كەڭەسىنىڭ جۇمىس ءتارتىبى جازىلعان.
قۇجاتقا ساي، قۇرىلتايدا دەپۋتاتتارعا قىزمەتىنە قاتىسى جوق جەكە ماسەلەلەرى بويىنشا ءسوز سويلەۋگە تىيىم سالىنادى.
- الداعى ۋاقىتتا قۇرىلتاي سايلانعان سوڭ، ەڭ الدىمەن، دەپۋتاتتىق ادەپ جونىندەگى قۇجاتتى قابىلدايتىن شىعار. ول ءار دەپۋتاتتىڭ ۇستەلىندە جاتادى. اتالعان قاعيدادا دەپۋتاتقا قاشان جانە قانشا ۋاقىت مالىمدەمە جاساۋعا بولادى ت. ب. ەرەجەلەر قامتىلادى. قۇرىلتاي مىنبەرىندە جەكە ماسەلەلەردى كوتەرۋگە بولمايدى دەگەن نورما قازىردىڭ وزىندە زاڭ جوباسىنا ەنگىزىلدى، - دەدى دەپۋتات.
سونىمەن قاتار، ايدوس سارىم ءتارتىپ بۇزعاندارعا قولدانىلاتىن شارالار جونىندە ايتتى.
- ايىپپۇل سالۋ قاراستىرىلماعان. ءبىراق ودان وزگە ءبىرقاتار شارا بار. مىسالى، سوگىس بەرۋدى اتاۋعا بولادى. نە بولماسا، قۇرىلتايدىڭ ءبىر نە ءۇش وتىرىسىندا سۇراق قويۋ، ساۋال جولداۋ، مالىمدەمە جاساۋ مۇمكىندىگىنەن ايرىلادى. ءتارتىپ بۇزعان دەپۋتاتتىڭ جاي عانا ميكروفونى قوسىلمايدى. دەمەك، بۇل ينستيتۋت جاڭا پارلامەنتتىك جانە ساياسي مادەنيەتتى قالىپتاستىرۋى ءتيىس، - دەدى ول.
ايتا كەتەيىك، بۇعان دەيىن «قازاقستان رەسپۋبليكاسىنىڭ قۇرىلتايى جانە ونىڭ دەپۋتاتتارىنىڭ مارتەبەسى تۋرالى» كونستيتۋتسيالىق زاڭ جوباسى ماقۇلدانىپ، سونىڭ اياسىندا دەپۋتاتتىق ادەپ قاعيدالارى بەكىتىلەتىنىن جازعانبىز.
