قۇمار ويىنعا سالىنىپ، اكە-شەشەمدى ەرتە قارتايتقانىما وكىنەمىن - نۇرتاس نۇرعالي ۇلى

اتىراۋ. KAZINFORM - پرەزيدەنت اتىراۋدا وتكەن ۇلتتىق قۇرىلتايدىڭ ءۇشىنشى وتىرىسىندا الەۋمەتتىك بەس كەسەلدىڭ تامىرىنا بالتا شابۋ ماسەلەسىن كوتەردى. سونداي قاۋىپتى كەسەلدىڭ ءبىرى - لۋدومانيا.

اتىراۋلىق نۇرتاس نۇرعالي ۇلى ونىڭ شىرماۋىندا 12 جىل بولعان. ال، بىلتىر ويىنقۇمارلارعا پسيحولوگيالىق كەڭەس بەرۋ ورتالىعىن اشتى.

- قۇمار ويىندى العاش ويعاندا قانشا جاستا ەدىڭ؟

- مەكتەپتە وقىعان كەزدە فۋتبول ويناۋشى ەدىم. فۋتبول كوماندالارىنىڭ ويىنىن قىزىعا قاراپ، جانكۇيەر بولدىم. بىرەۋ سەنەر، بىرەۋ سەنبەس، 9-سىنىپتى وقىپ جۇرگەندە قۇمار ويىنعا اقشا سالۋعا بەت بۇردىم. ءبىرىنشى كۇنى 10 مىڭ تەڭگە تىگىپ، ءبىراز اقشا ۇتتىم. سودان كەيىن قۇمار ويىنعا سالاتىن اقشانىڭ كولەمى بىرتە-بىرتە ۇلعايا ءتۇستى. بىردە ۇتىلدىم، ەندى بىردە اجەپتاۋىر اقشا ۇتىپ ءجۇردىم. اقشا ۇتقان كەزدە ونى ودان سايىن كوبەيتە ءتۇسۋدى ويلادىم. ويتكەنى، بۇل - جەڭىل تابىس. ال، جەڭىل تابىستى تەك قۇمار ويىننان عانا تابۋعا بولادى. وسىعان قىزىققانىم سونشا، اربالعانىمدى سەزبەي قالدىم. قۇمار ويىنمەن ون ەكى جىلىمدى وتكىزىپ، قۇربانى بولا جازداعانىمدى جاسىرمايمىن.

- اتا-اناڭ، اعايىن-تۋىستارىڭ بىلگەن شىعار...

- ءبىراز ۋاقىت جاسىرۋعا بولاتىن شىعار. ءبىراق، ۇنەمى جاسىرا المايسىڭ عوي. ونىڭ ۇستىنە قۇمار ويىنعا سالاتىن اقشا قاجەت. ۇنەمى قالتاڭدا مول اقشا بولا بەرمەۋى مۇمكىن. سونداي كەزدە قارىزعا اقشا سۇرايسىڭ. كوپ اقشا ۇتىپ وتىرعاندا، مول قارجىنى الىپ شىعىپ كەتۋگە ەرىك-جىگەر كەرەك. الايدا، كوكەيىڭدە «ەسەپشوتىمداعى قارجىنى ەسەلەي تۇسسەم» دەگەن وي تۇرادى. وسىنداي ويمەن ءجۇرىپ قوماقتى قارجى سالدىم. ءتىپتى ءۇيىم مەن كولىگىمنەن دە ايىرىلدىم.

قۇمار ويىندى ويناپ جۇرگەنىمدى اكە-شەشەم دە، اعايىن-تۋىستار دا، وتباسىم دا ءبىلدى. مەنىڭ بۇل ارەكەتىم اكە-شەشەمە، وتباسىما اۋىر سوققى بولدى. ولاردىڭ جۇرەگىنە اۋىر سالماق ءتۇسىردىم. اسىرەسە، اكە-شەشەمنىڭ ۋايىمعا سالىنىپ، جاسىنا جەتپەي قارتايۋىنا سەبەپكەر بولعانىما وكىنەمىن. ايەلىم اجىراسۋعا بەل بۋدى. ونى جوعالتۋدان قاتتى قورىقتىم. كوپ اقشا، باسپانا مەن كولىكتى جوعالتۋ كۇيزەلىسكە تۇسىرەدى. ال، مۇنداي كۇيزەلىس وزىڭە قول جۇمساۋعا تۇرتكى بولادى. سونداي وي مەن دە بولدى...

- لۋدومانيادان ارىلۋ وڭاي ەمەس دەيدى عوي، قالاي جەڭدىڭ؟

- شىندىعىن ايتقاندا، باس تارتۋىمنىڭ بىرنەشە سەبەبى بار.

بىرىنشىدەن، اقشاسىنان ۇتىلىپ، ىشكىلىككە سالىنعان جىگىتتەردى بىلەمىن. كوپىردەن سەكىرگەن جىگىتتەردى دە كوردىم.

ەكىنشىدەن، بىرەن- ساران بولماسا، ويىنعا سالىنعان وزگە ۇلتتىڭ وكىلى كوپ ەمەس. كوبى - قازاقتىڭ جاستارى. ولارعا قۇمار ويىننىڭ زاردابى جونىندە ەشكىم كەڭەس بەرىپ جاتقان جوق. ءتىپتى، ۆاحتالىق جۇمىستان كەيىن ۇيىنە بارماي تۇرىپ، الدىمەن ءباس تىگەتىن ورىنعا باراتىن جىگىتتەر دە بار.

ۇشىنشىدەن، قارىزعا العان اقشا كوبەيدى. قارىز بەرگەندەر اقشاسىن قايتارۋىمدى سۇراي باستادى. وسىنىڭ ءبارى اكە-شەشەمە، وتباسىما وڭاي بولمادى.

راسىندا قۇمار ويىننان باس تارتۋ وڭاي ەمەس. ماعان دا وڭاي بولعان جوق. شۇكىر، 2021 -جىلى قويدىم. ءسويتىپ، الماتىعا، استاناعا وڭالتۋ ورتالىقتارىنان كەڭەس الۋعا باردىم. ول ورتالىقتاردان قازاق جىگىتتەرىنە كەڭەس الۋ قيىن ەكەن، قازاقشا كەڭەس بەرەتىن مامان جوق. ەگەر ورىس تىلىنە شورقاق جاستار بولسا، ويىن جەتكىزۋدىڭ ءوزى قيىن.

- بىلتىر ويىنقۇمارلارعا پسيحولوگيالىق كەڭەس بەرۋ ورتالىعىن اشقان ەدىڭ. بۇل ورتالىققا كەڭەس الۋعا كەلەتىندەر كوپ پە؟

- ءيا، بىلتىر تيمۋر رامازانوۆ ەكەۋمىز قۇمار ويىننان زارداپ شەككەندەرگە پسيحولوگيالىق كەڭەس بەرۋ ورتالىعىن اشۋ يدەياسىن ۇسىندىق. قىركۇيەك ايىندا جۇمىسىن باستاعان ورتالىقتى «جاڭا ءومىر» دەپ اتادىق. سەبەبى، ەكەۋمىز دە قۇمار ويىننىڭ زاردابىن تارتتىق. ءوزىمىز سەكىلدى اقشاسىنان ايىرىلىپ، قۇمار ويىننىڭ قۇربانى بولىپ جۇرگەن قازاق جاستارىنىڭ جاڭا قادام جاساۋىنا ىقپال ەتكىمىز كەلدى.

بىلتىردان بەرى ءبىزدىڭ ورتالىققا 100-دەن استام ادام كەلىپ، كەڭەس الدى. بويجەتكەندەر دە، ءتىپتى كوپبالالى انالار دا كەلەدى. سونداي انالاردىڭ ءبىرى «كۇيەۋىم جۇمىس ىستەمەيدى. بالالارىمدى، وتباسىمدى اسىراۋ ءۇشىن وسىنداي قادامعا باردىم. بىردە ۇتىلىپ، ەندى بىردە اقشا تاپتىم» دەگەن ەدى. ءوز باسىمنان وتكەننەن كەيىن قۇمار ويىنعا اقشا سالۋدىڭ سوڭى ۇشپاققا شىعارمايتىنىن بىلەمىن. ازىن- اۋلىق اقشا ۇتقانعا مالدانىپ، كوپ قارجىسىنان ايىرىلۋى، سوڭى وكىنىشكە ۇرىندىراتىن قادامعا بارۋى مۇمكىن ەكەنىن جوققا شىعارمايمىن. نەگە؟ ويتكەنى، قوماقتى اقشادان ۇتىلۋ ادامنىڭ كوڭىل كۇيىنە، مىنەز-قۇلقىنا كەرى اسەر ەتەتىنىن بىلەمىن.

كەڭەس الۋعا كەلگەننەن كەيىن قۇمار ويىننان باس تارتىپ جاتقاندارى بار. دەمەك، ءبىزدىڭ ماقساتىمىز ىسكە باستادى.

ەسكە سالا كەتەلىك، بۇدان بۇرىن مەملەكەت باسشىسى ويىن بيزنەسى ماسەلەلەرى تۋرالى زاڭعا قول قويعان ەدى.

اۆتور

جولداسبەك شوپەعۇل