قۇجاتتاعى اتى-جونگە «كەلىنى»، «نەمەرەسى» سوزدەرىن تىركەپ جازۋعا بولا ما

استانا. KAZINFORM - ادىلەت مينيسترلىگىنىڭ رەسمي وكىلى تالعات ءۋالي ۆەدومستۆونىڭ باسپا ءسوز ءماسليحاتىندا ادامنىڭ تەگىن قۇجاتقا جازۋدىڭ تارتىپتەرىنە توقتالدى.

«سوڭعى ۋاقىتتا قوعامدا ءجيى قوزعالاتىن جانە جۋرناليستەر تاراپىنان ءجيى قويىلاتىن سۇراقتاردىڭ ءبىرى ازاماتتاردىڭ تەگىن، اتىن، اكەسىنىڭ اتىن بەرۋگە قاتىستى جايتقا تۇسىنىكتەمە بەرەيىن. بۇل نورما «نەكە جانە وتباسى تۋرالى» كودەكسپەن رەتتەلەدى. ادىلەت مينيسترلىگى ەل ازاماتتارىنىڭ اتى، تەگى، اكەسىنىڭ اتىن وزگەرتۋ تۋرالى ارنايى ستاتيستيكا جۇرگىزبەيدى. الايدا، ءبىزدىڭ مالىمەتىمىزشە، جىل سايىن ورتا ەسەپپەن 12 مىڭ ادام اتى- جونىنە وزگەرىستەر ەنگىزەدى»، - دەدى ول.

ايتۋىنشا، ازاماتتار ادىلەت ورگاندارىنا كوبىنەسە اتى-جونىندە بەيادەپ ءسوز بولۋىمەن جانە جازىلۋىندا ورفوگرافيالىق قاتە كەتكەن جاعدايمەن بايلانىستى جۇگىنەدى.

«سونىمەن بىرگە، «نەكە جانە وتباسى تۋرالى» كودەكستە جەكە تۇلعانىڭ تەگىن «تەگى»، «ۇرپاعى»، «نەمەرەسى»، «شوبەرەسى»، «كەلىنى» جانە ت. ب. سوزدەردى قوسىپ جازۋعا جول بەرىلمەيدى دەپ بەكىتىلگەن»، - دەدى تالعات ءۋالي.