قازاقستاندىقتاردىڭ قانشا پايىزى پرەزيدەنتتىڭ ارميانى رەفورمالاۋ تۋرالى شەشىمىن قولدايتىنى بەلگىلى بولدى

قاۋىمداستىق مەملەكەت باسشىسى قابىلداعان شارالارعا قوعامنىڭ كوزقاراسىن انىقتاۋ ماقساتىندا 28-29 قىركۇيەكتە ساۋالناما جۇرگىزگەن.

زەرتتەۋ ناتيجەسىنە سايكەس، رەسپوندەنتتەردىڭ 85,2 پايىزى قورعانىس مينيسترلىگىنىڭ قىزمەتىنە كەشەندى تەكسەرۋ جۇرگىزۋ تۋرالى شەشىمدى تولىق نەمەسە ءىشىنارا قولدايدى. ال ارميانى رەفورمالاۋ تۋرالى شەشىمدى وڭ باعالاعانداردىڭ ۇلەسى 85,7 پايىزدى قۇرادى.

ساۋالناما بارىسىندا قاتىسۋشىلارعا ارميادا قانداي وزگەرىستەر قاجەت دەگەن سۇراق قويىلىپ، بىرنەشە جاۋاپتى تاڭداۋعا مۇمكىندىك بەرىلگەن.

ەڭ كوپ قولداۋ تاپقان ۇسىنىس - قورعانىس مينيسترلىگىنىڭ اشىقتىعى مەن ەسەپتىلىگىن ارتتىرۋ. بۇل باعىتتى رەسپوندەنتتەردىڭ 47,4 پايىزى اتاعان.

كوماندالىق قۇرامدى جاڭارتۋ جانە ونىڭ كاسىبي دەڭگەيىن كوتەرۋدى 34,3 پايىز، قورعانىس سالاسىنداعى جەمقورلىققا قارسى كۇرەستى كۇشەيتۋدى 29,4 پايىز قولداعان.

- ساۋالناما ناتيجەسى قوعامنىڭ ارميادا جان- جاقتى وزگەرىس كۇتەتىنىن كورسەتەدى. ەلدىڭ قورعانىس قابىلەتىن نىعايتۋمەن قاتار، جۇرت اسكەري قىزمەتتىڭ كۇندەلىكتى ۇيىمداستىرىلۋى دا جاقسارعانىن قالايدى، - دەلىنگەن زەرتتەۋ قورىتىندىسىندا.

اسكەري قىزمەتشىلەردىڭ قاۋىپسىزدىگى مەن الەۋمەتتىك جاعدايىن جاقسارتۋدى ساۋالناماعا قاتىسقانداردىڭ 25,3 پايىزى ماڭىزدى دەپ سانايدى. قارۋ-جاراق پەن اسكەري تەحنيكانى جاڭارتۋدى 20,7 پايىز، جاڭا تەحنولوگيالاردى، ونىڭ ىشىندە سيفرلىق شەشىمدەردى ەنگىزۋدى 20,4 پايىز، جاۋىنگەرلىك دايارلىق پەن وقۋ- جاتتىعۋ دەڭگەيىن كوتەرۋدى 19,2 پايىز اتاعان.

ساۋالنامانى «دەموكراتيا ينستيتۋتى» عىلىمي-زەرتتەۋ قاۋىمداستىعى 2026 -جىلعى 28-29-قىركۇيەكتە ونلاين-ساۋالناما (CAWI) ادىسىمەن جۇرگىزگەن. وعان ەلىمىزدىڭ 17 وبلىسى مەن استانا، الماتى جانە شىمكەنت قالالارىنان 18 جاستان اسقان 1012 رەسپوندەنت قاتىسقان.

ايتا كەتەيىك، بۇعان دەيىن پرەزيدەنت قاسىم-جومارت توقايەۆ قارۋلى كۇشتەردى رەفورمالاۋ جوسپارىن ازىرلەۋدى تاپسىرعان بولاتىن. جوسپاردى قاۋىپسىزدىك كەڭەسىنىڭ قازان ايىنداعى وتىرىسىندا قاراۋ كوزدەلگەن.