قازاقستاننىڭ ديپلوماتيالىق وكىلدىكتەرى قازا تاپقان اسكەري قىزمەتشىلەردى ەسكە الدى

وسى كۇنى قازاقستاننىڭ شەتەلدەگى ەلشىلىكتەرىندە ەسكە الۋ شارالارى ءوتتى.

Kazinform اگەنتتىگىنىڭ بەلگياداعى مەنشىكتى ءتىلشىسىنىڭ حابارلاۋىنشا، جالپى ۇلتتىق ازا تۇتۋ كۇنىنە بايلانىستى قازاقستاننىڭ بريۋسسەلدەگى ەلشىلىگىنە شەتەلدىك ديپلوماتتار مەن جەرگىلىكتى ب ا ق وكىلدەرى كەلدى.

العاشقىلاردىڭ ءبىرى بولىپ ناتو جانىنداعى ازەربايجاننىڭ تۇراقتى وكىلى كوڭىل ايتتى. ول كوڭىل ايتۋ كىتابىنا جازبا قالدىردى.

بەلگيانىڭ Brussels Korner باسىلىمىنىڭ وكىلى قادىر دۋران دا كوڭىل ايتىپ، قولداۋ ءبىلدىردى. ول قازاقستاندىق اسكەري قىزمەتشىلەردىڭ قازاسىنا قابىرعاسى قايىسىپ، وسى كۇنى قازاقستان ەلشىلىگىنە كەلۋدى ءجون ساناعانىن اتاپ ءوتتى.

Kazinform اگەنتتىگىنىڭ قىتايداعى مەنشىكتى ءتىلشىسى حابارلاعانداي، بەيجىڭدەگى قازاقستان ەلشىلىگىندە قازا تاپقان اسكەري قىزمەتشىلەردى ەسكە الۋ ءۇشىن قازاقستاننىڭ مەملەكەتتىك تۋى تومەن ءتۇسىرىلدى.

ەسكە سالايىق، 2026-جىلعى 24-قىركۇيەكتە كاسپيدەگى اسكەري وقۋ-جاتتىعۋ كەزىندە 9 اسكەري قىزمەتشى قازا تاپقانىن حابارلاعانبىز. ءۇش اسكەري قىزمەتشى قۇتقارىلدى. ولاردىڭ بىرەۋى اۋرۋحاناعا جاتقىزىلدى.

كەيىننەن كاسپيدە قازا بولعان اسكەري قىزمەتشىلەردىڭ سانى 12 گە جەتىپ، ەكەۋى ىزدەستىرىلىپ جاتقانى حابارلاندى.

قورعانىس مينيسترلىگى وقۋ-جاتتىعۋ كەزىندە قازا تاپقان اسكەري قىزمەتشىلەردىڭ ءتىزىمىن جاريالادى.

اسكەري قىزمەتشىلەردىڭ قازا بولۋ فاكتىسى بويىنشا قىلمىستىق ءىس قوزعالىپ، تەرگەلىپ جاتقانىن جازدىق.

سونىمەن قاتار، پرەزيدەنت قاسىم-جومارت توقايەۆ ماڭعىستاۋ وبلىسىندا اسكەري وقۋ-جاتتىعۋ كەزىندەگى قايعىلى وقيعا سالدارىنان قازا تاپقان اسكەري قىزمەتشىلەردىڭ تۋعان-تۋىستارىنا كوڭىل ايتتى.

اسكەريلەردىڭ قازاسىنان كەيىن اقتاۋدا ءۇش كۇنگە جوسپارلانعان مەرەكەلىك شارالار وتپەيتىنى ايتىلدى.

بۇگىن كاسپيدە ەكى اسكەري قىزمەتشىنى ىزدەۋ وپەراتسياسىنا جۇزدەگەن ادام جۇمىلدىرىلعانى حابارلاندى.

سونىمەن قاتار اسكەري قىزمەتشىلەردىڭ قاۋىپسىزدىگىنە جاۋاپتى تۇلعالار كۇدىككە ىلىنگەنى تۋرالى جازعان ەدىك.

ايتا كەتەلىك كاسپييدەگى توتەنشە جاعدايدان كەيىن قۇتقارىلعان اسكەري قىزمەتشى ەسىن جيعان ەدى.

بۇگىن كاسپي تەڭىزىندە جوعالعان ەكى اسكەري قىزمەتشىنىڭ دەنەسى تابىلىپ، ىزدەستىرۋ وپەراتسياسى اياقتالعان ەدى.

سونىمەن قاتىر كاسپيدەگى اسكەري قىزمەتشىلەردىڭ قازاسىنا بايلانىستى قىلمىستىق ءىس ەكى باپ بويىنشا تەرگەلىپ جاتىر.

قىزمەتكە سالعىرت قاراۋ جانە كورابل جۇرگىزۋ قاعيدالارىن بۇزۋ بويىنشا اۋىر زارداپتارعا اكەپ سوققان قىلمىستىق قۇقىق بۇزۋشىلىقتار جاسادى دەگەن كۇدىكپەن ق ر قارۋلى كۇشتەرىنىڭ جوعارى جانە اعا كوماندالىق قۇرامىنداعى جاۋاپتى لاۋازىمدى تۇلعالار ۇستالعانى بەلگىلى بولدى.