قازاقستاننىڭ ءتورت وبلىسى اكىمىنىڭ ورىنباسارلارى سوگىس الدى

بالقاش. KAZINFORM - بالقاش قالاسى پرەمەر-ءمينيستردىڭ ورىنباسارى ەرمەك كوشەربايەۆتىڭ جەتەكشىلىگىمەن قۇرىلعان ۆەدومستۆوارالىق جۇمىس توبى جۇرگىزگەن رەسپۋبليكالىق ينسپەكسيا بارىسىندا سىنعا ىلىكتى.

تەكسەرۋ اياسىندا الماتى، قاراعاندى، جەتىسۋ جانە اباي وبلىستارىنىڭ كۋرورتتىق ايماقتارى قامتىلىپ، تۋريزم سالاسىنداعى كۇردەلى جۇيەلى پروبلەمالار انىقتالدى.

ينسپەكتسيا قورىتىندىسى بويىنشا بالقاش قالاسىنىڭ اكىمى تارتىپتىك جازاعا تارتىلىپ، وعان رەسمي تۇردە سوگىس جاريالاندى. مۇنداي شەشىم تۋريستىك ينفراقۇرىلىمنىڭ قاناعاتتانعىسىز جاعدايى مەن جاعاجايلاردا سانيتارلىق تالاپتاردىڭ ورەسكەل بۇزىلۋىنا بايلانىستى قابىلدانعان.

پرەمەر-ءمينيستردىڭ باسپا ءسوز قىزمەتىنىڭ مالىمەتىنشە، كوممۋنالدىق جاعاجايلارداعى احۋال ەرەكشە الاڭداۋشىلىق تۋعىزعان. تەكسەرۋ بارىسىندا اباتتاندىرۋ تالاپتارىنىڭ ساقتالماۋى، كاسىپكەرلەر تاراپىنان كاسسالىق ءتارتىپتىڭ بۇزىلۋى، چەكتەردىڭ بەرىلمەۋى، سانيتارلىق- گيگيەنالىق جانە قاۋىپسىزدىك نورمالارىنىڭ ورىندالماۋى سىندى زاڭبۇزۋشىلىقتار تىركەلگەن.

10- 12-شىلدە كۇندەرى جۇمىس توبى بالقاشقا بارىپ، جاعدايدى كوزبەن كورىپ قايتتى. دەلەگاتسيا مۇشەلەرى تۋريستەرمەن كەزدەسىپ، دەمالىس ورىندارىن ارالاپ، كورسەتىلەتىن قىزمەتتەردىڭ ساپاسىمەن تانىستى. قالاعا كەلگەن قوناقتار ينفراقۇرىلىمنىڭ ناشارلىعى، قولايلىلىقتىڭ جوقتىعى، جاعاجايلاردىڭ تازالانباۋى جانە قاۋىپسىزدىك شارالارىنىڭ ساقتالماۋىنا قاتىستى شاعىم ايتتى.

تەكسەرۋ قورىتىندىسىندا تۋريزم سالاسىنا جەتەكشىلىك ەتەتىن قاراعاندى وبلىسى اكىمىنىڭ ورىنباسارىنا قاتاڭ سوگىس جاريالاندى. سونداي- اق بالقاشتىڭ ءبىرقاتار اۋىلدىق وكرۋگ اكىمدەرىنىڭ اتىنا دا تارتىپتىك جازا قولدانىلدى. بۇدان بولەك، وبلىستىق تۋريزم، كاسىپكەرلىك، ەكولوگيا، ساۋلەت جانە ساۋدا باسقارمالارىنىڭ باسشىلارى جاۋاپكەرشىلىككە تارتىلدى. سونىمەن قاتار، ەكولوگيا، دەنساۋلىق ساقتاۋ، قارجى، سۋ رەسۋرستارى، كولىك جانە ساۋدا مينيسترلىكتەرىنىڭ اۋماقتىق بولىمشەلەرىنىڭ جەتەكشىلەرىنە دە تيىستى شارالار قابىلداندى.

قازىرگى ۋاقىتتا وڭىردە ورتالىق مەملەكەتتىك ورگانداردىڭ قاتىسۋىمەن قوسىمشا تەكسەرۋلەر باستالدى. ولاردىڭ ناتيجەسىندە تۋريزم ينفراقۇرىلىمىن جاقسارتۋعا باعىتتالعان جول كارتاسى ازىرلەنەتىن بولادى. قۇجاتتا جۇيەلى ماسەلەلەردى جويۋعا ارنالعان شۇعىل ءىس- شارالار قامتىلادى.

سونىمەن بىرگە، جۇمىس توبىنىڭ نەگىزىندە تۇراقتى تۇردە جۇمىس ىستەيتىن جوبالىق كەڭسە قۇرىلدى. ونىڭ مىندەتى - كۋرورتتىق ايماقتارداعى اباتتاندىرۋ جۇمىستارىن، تۋريستىك قىزمەت ساپاسىن ارتتىرۋدى جانە قوعامدىق ءتارتىپتى قامتاماسىز ەتۋدى ۇيلەستىرۋ.

ەسكە سالايىق، بيىلعى جازدا بالقاش قالاسىنا تۋريستەر كوپتەپ كەلگەنىمەن، كورسەتىلەتىن قىزمەت ساپاسى مەن ينفراقۇرىلىم دەڭگەيى قوعامدا كەڭ تالقىلانعان بولاتىن. جەرگىلىكتى تۇرعىندار مەن بەلسەندىلەر بۇل ماسەلەنى بۇعان دەيىن بىرنەشە رەت كوتەرىپ، ەندى ول ۇكىمەت دەڭگەيىندە رەسمي جاۋاپقا يە بولدى. 

وسىعان دەيىن 2025 -جىلدىڭ ءبىرىنشى جارتىسىندا بالقاش كولىنىڭ دەڭگەيى ورتا ەسەپپەن 32 س م-گە كوتەرىلگەنى ءمالىم بولدى.

اۆتور

ايزادا اگيلبايەۆا