قازاقستاننىڭ 64 مۇعالىمى «ۇزدىك پەداگوگ» اتاعىنا يە بولدى
ەلىمىز بويىنشا وتكىزىلگەن «ۇزدىك پەداگوگ-2023» رەسپۋبليكالىق بايقاۋىنىڭ قورىتىندىسى شىعارىلدى، دەپ حابارلايدى Kazinform.
وقۋ-اعارتۋ مينيسترلىگىنىڭ باسپا ءسوز قىزمەتى ۇسىنعان اقپاراتقا سۇيەنسەك، مەكتەپكە دەيىنگى، ورتا، تەحنيكالىق جانە كاسىپتىك ءبىلىم بەرۋ ۇيىمدارىنىڭ 64 پەداگوگى ءوز ماماندىعى بويىنشا ۇزدىك اتاندى.
سارسەنبى كۇنى مينيستر عاني بەيسەمبايەۆ جەڭىمپازدارعا سالتاناتتى تۇردە ماراپاتتارىن تابىستادى.
«مۇعالىم تەك ماماندىق ەمەس، جۇرەكتىڭ تاڭداۋى، جاننىڭ قالاۋى. قاي زاماندا بولسىن اعارتۋشىلار قوعامدى ەڭ قۇندى دۇنيە - بىلىمگە جەتەلەيتىن كورنەكتى تۇلعالار سانالدى. مەنىڭشە، پەداگوگتەردىڭ جانكەشتى ەڭبەگىنىڭ ءمانى وسى. جىل سايىن ءبىزدىڭ مۇعالىمدەر حالىقارالىق ارەنادا جوعارى جەتىستىكتەرگە جەتۋدە. كەشە عانا جاريالانعان PISA-2022 جاھاندىق رەيتينگىنىڭ ناتيجەلەرى دە - تىكەلەي ءبىزدىڭ ۇستازدارىمىزدىڭ ەڭبەگىنىڭ جەمىسى. بۇگىن سىزدەردىڭ اعارتۋشىلىق قىزمەتتەرىڭىزدىڭ ماڭىزدىلىعىن تاعى ءبىر رەت اتاپ ءوتۋ ءۇشىن جينالدىق. سىزدەردىڭ ەرەن ەڭبەكتەرىڭىز بەن ءوز ىستەرىڭىزگە ادالدىقتارىڭىز ءۇشىن شىن جۇرەكتەن ريزاشىلىعىمدى بىلدىرەمىن»، - دەدى ۆەدومستۆو باسشىسى.
كونكۋرس جەڭىمپازدارى «ۇزدىك پەداگوگ» كۋالىگىن، «ۇزدىك پەداگوگ» توسبەلگىسىن جانە 3450000 تەڭگە (1000 ا ە ك) كولەمىندە اقشالاي سىياقى الدى.
ايتا كەتەيىك، «ۇزدىك پەداگوگ» كونكۋرسى 2012 -جىلدان باستاپ وتكىزىلىپ كەلەدى. وسى كۇنگە دەيىن 624 پەداگوگ ۇزدىك دەپ تانىلىپ، ولاردىڭ ءارقايسىسىنا مەملەكەتتىك قولداۋ رەتىندە 1000 ايلىق ەسەپتىك كورسەتكىش مولشەرىندە سىياقى بەرىلدى.
«بيىل كونكۋرسقا قاتىسۋ ءۇشىن بارلىعى 961 ءوتىنىم ءتۇستى. كونكۋرستى وتكىزۋ ءراسىمى اۆتوماتتاندىرىلعان جانە ول اشىق تۇردە ءوتتى. رەسپۋبليكالىق كونكۋرستىق كوميسسيانىڭ قۇرامىنا ۇكىمەتتىك ەمەس ۇيىمدار، اتا-انالار قاۋىمىنىڭ وكىلدەرى، جۋرناليستەر، بەلسەندى پەداگوگتەر، ءبىلىم جانە عىلىم قىزمەتكەرلەرىنىڭ قازاقستاندىق سالالىق كاسىپوداعىنىڭ وكىلدەرى جانە تاعى باسقالارى كىردى»، - دەلىنگەن مينيسترلىك مالىمەتىندە.
اۆتور
گۇلميرا الياكپاروۆا
