قازاقستاندىقتار وتە مەيىرىمدى، ۇنەمى قول ۇشىن سوزۋعا دايىن - فرانسۋز سپورتشىسى گاەتان بلو

استانا. قازاقپارات - 19 جاستاعى فرانسۋز گاەتان بلو دۇنيەجۇزىلىك كوشپەندىلەر ويىندارىندا جامبى اتۋدان باعىن سىناپ جاتىر. قازىر جامبى اتۋدان فرانسيا قۇراماسىنىڭ قورجىنىندا ەكى مەدال بار. كوشپەندىلەر ويىندارىنا ارنايى كەلگەن سپورتشىمەن تىلدەسكەن ەدىك.

«دۇنيەجۇزىلىك كوشپەندىلەر ويىندارىنا قاتىسۋعا ءبىزدى ارنايى شاقىردى. فرانسيا كومانداسى قۇرامىندا 10 ادام بار، ال قازىر «جامبى اتۋعا» 4 ادام قاتىسىپ جاتىر. جامبى اتۋدان بولەك، ءبىزدىڭ سپورتشىلار «قازاق كۇرەسى» مەن «ساداق اتۋدان» باق سىنايدى. كەشە جامبى اتۋ سپورتىنىڭ ماجار ستيلى بويىنشا 80 سپورتشىنىڭ ىشىنەن وتانداسىمىز رافاەل مالەت العاشقى التىن مەدالدى جەڭىپ الدى، مەن قولا جۇلدەگە يە بولدىم. بۇگىن جامبى اتۋدان ازيا ستيلى بويىنشا جارىس ءوتىپ جاتىر، ازىرگە قورىتىندى ناتيجە بەلگىسىز، ءبىراق، جاقسى ويىن كورسەتتىم دەپ ويلايمىن. جامبى اتۋدى 10 جاسىمنان باستاپ وينايمىن، بۇل سپورت ءتۇرى فرانسيادا اسا تانىمال ەمەس، ءبىراق ماعان ۇنايدى»، - دەدى فرانسيادان كەلگەن جامبى اتۋشى گاەتان بلو.

ونىڭ ايتۋىنشا، جامبى اتۋدان قازاقستان، قىتاي جانە موڭعوليا كومانداسى - مىقتى قارسىلاستار.

«بۇل مەنىڭ قازاقستانعا العاشقى ساپارىم. ماعان ۇناعانى قازاقستاندىقتار وتە مەيىرىمدى، ۇنەمى قول ۇشىن سوزۋعا دايىن»، - دەيدى ول.

سونداي-اق، فرانسيالىق قوناق قىمىزدىڭ ءدامىن تاتقانىن ايتتى.

اۆتور

داۋلەت ىزتىلەۋ