قازاقستاندىقتار جەكە كۋالىكتى ونلاين اۋىستىرا الادى

استانا. KAZINFORM - قازاقستاندا تاعى ءبىر مەملەكەتتىك قىزمەتتى ونلاين فورماتتا الۋ مۇمكىندىگى تۋىندادى.

جاڭا قىزمەت تۋرالى ىشكى ىستەر مينيسترلىگى مەن سيفرلىق دامۋ، يننوۆاتسيالار جانە ايەروعارىش ونەركاسىبى مينيسترلىگى ءتيىستى بىرلەسكەن بۇيرىقتى جاريالادى.

بۇيرىقتا مەملەكەتتىك قىزمەت كورسەتۋدىڭ تيىمدىلىگىن ارتتىرۋ ماقساتىندا پيلوتتىق جوبا ىسكە قوسىلاتىنى ايتىلعان، ياعني جەكە كۋالىكتەردى ونلاين فورماتتا راسىمدەۋ مۇمكىندىگى.

جەكە كۋالىكتى ونلاين قالاي راسىمدەۋگە بولادى:

- جاڭا قۇجاتتى ەلەكتروندىق ۇكىمەت پورتالىندا نەمەسە eGov Mobile قوسىمشاسىندا راسىمدەۋگە بولادى، ەگەر جەكە كۋالىگىڭىزدىڭ جارامدىلىق مەرزىمى اياقتالعان بولسا؛
- جەكە كۋالىكتى راسىمدەۋ ءۇشىن ەلەكتروندىق ۇكىمەت پورتالىندا نەمەسە eGov Mobile قوسىمشاسىندا ءوتىنىم تولتىرىپ، ونى ە س ق (ەلەكتروندى سيفرلىق قولتاڭبا) كومەگىمەن قول قويۋ قاجەت؛
— كورسەتىلگەن فورماتقا ساي فوتو ءتۇسىرىپ، وتىنىمگە تىركەۋ كەرەك؛
— ۋاكىلەتتى ورگان ءوتىنىمدى تەكسەرەدى، ياعني تىركەلگەن مەكەنجايدى، جەكە كۋالىكتىڭ مەرزىمىن جانە تىركەلگەن فوتونى؛
— ەگەر تەكسەرىس ءساتتى وتسە، مەملەكەتتىك باج سالىعىن تولەۋ قاجەت؛
— قىزمەت كورسەتۋ ناتيجەسى بويىنشا حابارلاما جىبەرىلەدى؛
— دايىن جەكە كۋالىكتى حالىققا قىزمەت كورسەتۋ ورتالىعىنان الادى.

قوس مينيسترلىكتىڭ بىرلەسكەن بۇيرىعى 28 -مامىردا كۇشىنە ەندى جانە 2026 -جىلعى 31 -ناۋرىزعا دەيىن قولدانىستا بولادى.

بۇعان دەيىن جەكە كۋالىكتى اۋىستىرۋ تولىعىمەن ونلاين فورماتقا كوشىرىلەتىنى تۋرالى جازعان ەدىك.

اۆتور

داۋلەت ىزتىلەۋ