قازاقستاندىقتار جاسىل ەنەرگەتيكا سالاسىندا قانداي پاتەنتتەر تىركەدى
استانا. KAZINFORM - سوڭعى 10 جىلدىڭ ىشىندە وتاندىق ونەرتاپقىشتار جەل گەنەراتورى، كۇن پانەلدەرىن تازالاۋ جۇيەسى، بىرنەشە ساتىلى كۇن جانە جەل قوندىرعىلارى سىندى كوپتەگەن ونەرتابىستى پاتەنتتەدى.
ەلىمىزدىڭ ادىلەت مينيسترلىگى زياتكەرلىك مەنشىك قۇقىعى كوميتەتىنە قاراستى ۇلتتىق زياتكەرلىك مەنشىك ينستيتۋتىنىڭ مالىمەتىنشە، 2015-2024-جىلدارى ارالىعىندا ەلىمىزدە جاڭارتىلاتىن ەنەرگيا سالاسىندا 272 پاتەنت تىركەلگەن.
- جەل ەنەرگياسىن پايدالاناتىن ونەرتابىستارعا پاتەنتتىڭ ەڭ كوپ سانى تىركەلدى – 129، سۋدىڭ گيدروديناميكالىق ەنەرگياسىن قولداناتىن پاتەنتتەر سانى - 61. كۇن ساۋلەسى ەنەرگياسىن قولداناتىن ونەرتابىستاردىڭ سانى – 44، گەوتەرمالدى ەنەرگيانى پايدالاناتىن ونەرتابىستارعا پاتەنتتەردىڭ ەڭ از سانى بەرىلگەن – 38، - دەپ ناقتىلادى ينستيتۋتتان.
مىسالى، 2017-جىلى بلوك شايكەنوۆ «جەل دوڭگەلەگى جانە ۇنەمدى ەلەكتر ەنەرگياسىن ءوندىرۋ ءۇشىن قالاقشالارى بۇگىلگەن جەل دوڭگەلەگىن جاساۋ ءادىسى» ونەرتابىسىنا پاتەنتىن الدى. ونەرتابىس كەيىنىرەك ەۋروپالىق، امەريكالىق، قىتايلىق، جاپوندىق جانە وڭتۇستىك كورەيالىق پاتەنتتەر تۇرىندە تىركەلدى، ءتىپتى «ەكسپو-2017» كورمەسىندە ۇسىنىلدى. ونىڭ ارتىقشىلىعى - حوككەي تاياقشاسى تۇرىندەگى جەل دوڭگەلەگىنىڭ ارنايى ديزاينىنىڭ ارقاسىندا جەل ەنەرگياسىن پايدالانۋ كوەففيتسيەنتىنىڭ جوعارىلاۋى، سونداي-اق جەل قوندىرعىسىنىڭ ماتەريالدارى مەن سالماعىنىڭ ازايۋى.
ءال-فارابي اتىنداعى قازاق ۇلتتىق ۋنيۆەرسيتەتى 2021-جىلى كۇن ەنەرگياسىن ۇتىمدى پايدالانۋ ءۇشىن كۇن پانەلدەرىنىڭ قورعانىش پلاستينالارىن شاڭنان تازارتۋ جۇيەسىن پاتەنتتەدى. جاڭارتىلاتىن ەنەرگيا كوزدەرىنىڭ قۋاتى از نىساندارىنا قۇراستىراتىن وتاندىق «Tree Energy» كومپانياسى قۋاتى 3,5 جانە 10 ك ۆ ت- تىڭ جەل گەنەراتورلارىنا پاتەنت توپتاماسىن تىركەدى.
وتكەن جىلى ق. ساتبايەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتى ەلەكتر ەنەرگياسىن ءوندىرۋدىڭ گيدروەلەكترلىك ەنەرگيا جۇيەسىن پاتەنتتەدى، ال كوپ ۇزاماي بۇل ونەرتابىستى ەۋرازيالىق پاتەنتتىك ۆەدومستۆودا تىركەدى. شاعىن گ ە س- ءتى اتوم ونەركاسىبى كاسىپورىندارىندا قۇم تۇندىرعىشقا تۇسەتىن تەحنولوگيالىق ەرىتىندىلەردىڭ قوزعالىسى كەزىندە ەلەكتر ەنەرگياسىن ءوندىرۋ ەسەبىنەن پايدالانۋعا بولادى.
قىزىقتى ونەرتابىستاردىڭ قاتارىنا كۇمبەزدى كۇن ترەكەرى، جەل ەلەكتر ستانسياسى، كۇن ەلەكتر قوندىرعىسىنىڭ فوتوەلەكترلىك مودۋلى، ۆاكۋمدىق فراكتالدىق كۇن كوللەكتورى، كۇن كوللەكتورىنا نەگىزدەلگەن جىلۋمەن جابدىقتاۋ جۇيەسى جانە باسقالارى بار.
ءبىر قىزىعى، بىزدە جەك سالاسىندا پاتەنتتەر كوپ بولا الار ەدى. ءبىراق ولاردىڭ كوپشىلىگى مەملەكەتتىك باج سالىعىن تولەمەۋ سەبەبىنەن مەرزىمىنەن بۇرىن توقتاتىلدى. ونىڭ جىل سايىنعى بەلگىلەنگەن مولشەرى ازاماتتاردىڭ ساناتىنا بايلانىستى بەلگىلەنەدى - زاڭدى تۇلعا، جەكە تۇلعا، جەڭىلدىك يەلەنۋشىلەر.
مۇنىڭ ۇستىنە ينستيتۋت ءار پاتەنتتىڭ ءوز مەرزىمى بار ەكەندىگىن العا تارتادى: پايدالى مودەلگە - 5 جىل، ونەرتابىستارعا - 20 جىل. سودان كەيىن پاتەنتتى ءۇش جىلعا ۇزارتۋعا ءوتىنىش بەرۋگە بولادى. ءبىراق ەگەر پاتەنتكە قولداۋ كورسەتىلمەسە، وندا ءوتىنىش بەرۋشى مەرزىمىن قالپىنا كەلتىرمەيدى جانە پاتەنت قوعامدىق يگىلىككە اينالادى.
بۇعان دەيىن وتاندىق عالىمدار 3 جىلدا 81 حالىقارالىق پاتەنت العانىن جازعان ەدىك.
