قازاقستاندىق عالىمدار تازىنىڭ گەنەتيكالىق قۇرىلىمىن زەرتتەپ، ەرەكشە تۇقىم ەكەنىن انىقتادى

استانا. KAZINFORM - قازاقى تازى ءيت تۇقىمى - قازاقستاننىڭ ناعىز ۇلتتىق قازىناسى بولىپ سانالادى، ويتكەنى ول وتە ماڭىزدى گەنەتيكالىق جانە مادەني مۇرانى ايقىندايدى. مۇنداي ءيت تۇقىمىنىڭ گەنەتيكالىق قۇرىلىمى وسى ۋاقىتقا دەيىن جۇمباق كۇيىندە قالىپ كەلگەن بولسا، ەندى ق ر «گەنەتيكا جانە فيزيولوگيا ينستيتۋتى» ر م ك عالىمدارى ەڭ زاماناۋي مولەكۋلالىق- گەنەتيكالىق ادىستەردى قولدانا وتىرىپ، بۇل جۇمباقتىڭ جاۋابىن شەشۋدى ۇيعاردى.

2021 -جىلى ينستيتۋتتىڭ عالىمدارى قازاقى تازى تۇقىمىن گەنەتيكالىق تۇرعىدان زەرتتەۋگە گرانت ۇتىپ العان، ولارعا بيولوگيا عىلىمدارىنىڭ كانديداتى، اعا عىلىمي قىزمەتكەر اناستاسيا پەرفيليەۆا جەتەكشىلىك ەتتى. جوبا 2023 -جىلى اياقتالدى.

تازى تۇقىمىنىڭ گەنەتيكالىق ارتۇرلىلىگى مەن پوپۋلياتسيالىق قۇرىلىمىن انىقتاۋ ءۇشىن ينستيتۋت عالىمدارى زەرتتەۋ بارىسىندا گەنەتيكالىق ماركەرلەردىڭ ەكى ءتۇرىن، ميكروساتەلليتتەر مەن ءبىر نۋكلەوتيدتى نۇسقالاردى العاش رەت قولداندى.

«تالداۋ ناتيجەسى تازى تۇقىمىنىڭ گەنەتيكالىق ارتۇرلىلىگى جوعارى، ال ينبريدينگ دەڭگەيى تومەن، بىرەگەي ەرەكشە تۇقىم ەكەندىگىن كورسەتتى. بۇل تۇقىمنىڭ گەنەتيكالىق الەۋەتى، اسىرەسە، وڭتۇستىك جانە شىعىس قازاقستاندا كوبىرەك بايقالادى، ال سولتۇستىك وڭىردە سايكەسىنشە از ەكەندىگى انىق. زەرتتەۋ ناتيجەسىنىڭ ەڭ قىزىقتى جاڭالىقتارىنىڭ ءبىرى - تازى ەجەلدەن كەلە جاتقان، ءارى فيلوگەنەتيكالىق تاريحتا بەرىك ورىن العان تۇقىم ەكەنىنىڭ راستالعانى بولدى.

سونداي-اق تازى تۇقىمىنىڭ پوپۋلياتسياسى 50 شاقتى ۇرپاق بۇرىن گەنەتيكالىق تۇرعىدان تىعىرىققا تىرەلىپ، جويىلىپ كەتۋ قاۋپى تونگەنى انىقتالدى»، - دەپ اتاپ ءوتتى بيولوگيا عىلىمدارىنىڭ كانديداتى، پروفەسسور باقىتجان بەكمانوۆ.

ينستيتۋت قىزمەتكەرلەرىنىڭ ايتۋىنشا، قازىر تازى تۇقىمىنىڭ اڭشىلىق جانە جۇمىس ىستەۋ قابىلەتىنە جاۋاپ بەرەتىن 18، 22 جانە 25 حروموسومالارداعى بەس باعىت ەرەكشە قىزىعۋشىلىق تۋدىرىپ وتىر.

ال وسى ايماقتاردا ورنالاسقان 12 گەننىڭ ىشىندەگى CAB39L گەنى تازى ءيتىنىڭ جۇگىرۋ جىلدامدىعى مەن توزىمدىلىگىنە اسەر ەتەتىن ۇمىتكەر- گەن بولا الادى.

بۇل ناتيجەلەر بولاشاقتا تازى تۇقىمىن ودان ءارى جاقسارتۋ مەن ولاردى ساقتاپ قالۋ ءۇشىن جاڭا مۇمكىندىكتەر اشىپ، تازى تۇقىمىن تاۋەلسىز جەكە تۇقىم رەتىندە حالىقارالىق دەڭگەيدە مويىنداۋ تۋرالى ۇسىنىسقا قولداۋ بولا الادى.

سونىمەن قاتار بۇل زەرتتەۋلەر تازى تۇقىمىنىڭ گەنەتيكالىق قۇپياسىن اشىپ قانا قويماي، ولاردىڭ تاريحى مەن سەلەكتسياسى تۋرالى تۇسىنىگىمىزدى تەرەڭدەتە تۇسەرى انىق.

اۆتور
اسحات رايقۇل