قازاقستاندىق عالىمدار سۋدى ۋلى زاتتاردان تازارتۋعا ارنالعان سوربەنت ازىرلەپ جاتىر
استانا. KAZINFORM - ساتبايەۆ ۋنيۆەرسيتەتى عالىمدارى تەرميالىق جانە قىشقىلدىق ادىسپەن بەلسەندىرىلگەن قازاقستاندىق بەنتونيت سازىن كۇمىس نانوبولشەكتەرى، يوندىق ەمەس پوليمەر جانە بيوپوليمەر، اتاپ ايتقاندا ميكروكريستالدى تسەلليۋلوزامەن ۇيلەستىرە وتىرىپ، جاڭا كومپوزيتتىك ماتەريال شىعارۋدى كوزدەپ وتىر. بۇل تۋرالى عىلىم جانە جوعارى ءبىلىم مينيسترلىگى ءمالىم ەتتى.
الىنعان ماتەريال سۋدى زالالسىزداندىرۋ ارقىلى تازارتا وتىرىپ، ۋلى قوسپالار مەن ميكروورگانيزمدەردى جويۋعا قابىلەتتى.
- ءبىز ءىرى ونەركاسىپ ورتالىقتارىنداعى قالدىق سۋدى تازالاۋعا جانە شالعاي اۋىلدىق ايماقتاردى تازا سۋمەن قامتاماسىز ەتۋگە مۇمكىندىك بەرەتىن قولجەتىمدى جانە ەكولوگيالىق تازا ءونىم الۋ ارقىلى جالپى تۇشى سۋ ماسەلەسىن شەشۋگە ۇمتىلامىز. قازىردىڭ وزىندە ءبىزدىڭ ماتەريالدار وندىرىستىك قالدىق سۋداعى اۋىر مەتال يوندارىنىڭ 70 پايىزىن ءبولىپ الۋعا ءتيىمدى بولىپ وتىر، - دەدى جوبا جەتەكشىسى، PhD دوكتورى ماديار بەيسەبەكوۆ.
جوبا اياسىندا الماتى مەن شىعىس قازاقستان وبلىستارىنىڭ اعىندى سۋىنا زەرتتەۋ جۇرگىزىلدى. ول جۇمىستار ساتبايەۆ ۋنيۆەرسيتەتى مەن «كومپوزيتتىك ماتەريالدار عىلىمي ورتالىعى» ج ش س- ءنىڭ بازالارىندا جۇزەگە اسىرىلادى. ناتيجەسىندە پوليمەر-سازدى كومپوزيتتەردى الۋدىڭ وڭتايلى شارتتارىن انىقتاۋعا جانە ولاردىڭ تيىمدىلىگىن زەرتحانالىق جاعدايدا تەكسەرۋگە مۇمكىندىك تۋدى.
- ەكى جارىم جىل بويى ءبىز اعىن سۋعا مونيتورينگ جۇرگىزدىك، جەرگىلىكتى بەنتونيت سازى نەگىزىندە پوليمەر-كومپوزيتتىك ماتەريالدار جاساپ، ولاردى سىناقتان وتكىزدىك. زەرتتەۋ ناتيجەسىندە الىنعان ماتەريالدار سۋداعى ۋلى قوسپالاردى ءبولىپ الۋ ءۇشىن جوعارى سوربتسيالىق پوتەنتسيالعا يە ەكەندىگى راستالدى، - دەيدى جوبانىڭ عىلىمي كەڭەسشىسى، تەحنيكا عىلىمدارىنىڭ كانديداتى، پروفەسسور سانا قابدراحمانوۆا.
جوبا مەملەكەتتىك باستامالاردى، اتاپ ايتقاندا «اۋىز سۋ» باعدارلاماسى (2001-2030) جانە 2025-جىلعا دەيىنگى «سۋ رەسۋرستارىن باسقارۋ جونىندەگى ۇلتتىق جوبانى» جۇزەگە اسىرۋدى قولدايدى. بۇل زەرتتەۋ ناتيجەلەرى ەلىمىزدە تۇشى سۋ قورىنىڭ شەكتەۋلى جاعدايىندا جانە كۇننەن كۇنگە قوردالانعان ەكولوگيالىق وزەكتى ماسەلەلەر ءۇشىن قالدىق سۋدى تازالاۋ مەن اۋىز سۋ قاۋىپسىزدىگىن ارتتىرۋدا شەشۋشى ءرول اتقاراتىنى ءسوزسىز.
بۇعان دەيىن حابارلانعانداي، عالىمدار اتموسفەرالىق اۋادان سۋ وندىرەتىن جاڭا قۇرىلعى جاساپ شىعاردى.
