قازاقستانداعى مەديتسينالىق مەكەمەلەرگە قوماقتى سومادا ايىپپۇل سالىندى
استانا. KAZINFORM -ەلىمىزدەگى كەيبىر ەمحانالار مەن اۋرۋحانالارعا، اسكەري گوسپيتالدار مەن لازارەتتەرگە 73 ميلليون 539 مىڭ تەڭگەگە ايىپپۇل سالىندى.
ق ر ساۋدا جانە ينتەگراتسيا مينيسترلىگى تەحنيكالىق رەتتەۋ جانە مەترولوگيا كوميتەتىنىڭ مالىمەتىنشە، 2023 -جىلى مەديتسينالىق مەكەمەلەرگە قاتىستى 671 تەكسەرۋ جاسالدى.
تەكسەرۋ بارىسىندا 104 مەديتسينالىق مەكەمەدە 6 مىڭنان استام سەنىمسىز ولشەۋ قۇرالى انىقتالدى. ولاردىڭ اراسىندا قان قىسىمىن ولشەيتىن جابدىقتار، وكپەنى جاساندى جەلدەتۋ اپپاراتتارى، ديفەبريللياتورلار، سونداي-اق جاڭا تۋعان نارەستەلەرگە ارنالعان ينكۋباتورلار بار.
«مەديتسيناداعى ولشەۋ قۇرالىن ۋاقتىلى سالىستىرىپ، تەكسەرۋدىڭ بولماۋى سالدارىنان قاتە ناتيجەلەردى كورسەتۋى مۇمكىن. بۇل تۇرعىدا قاتە دياگنوز قويىلۋى ىقتيمال جانە ادام دەنساۋلىعى مەن ومىرىنە ەلەۋلى قاۋىپ توندىرەدى»- دەدى تەحنيكالىق رەتتەۋ جانە مەترولوگيا كوميتەتىنىڭ ءتوراعاسى قۋانىش ەلىكبايەۆ.
