قازاقستانداعى ەليتالى مەكتەپ وقۋشىلارىنىڭ 8 پايىزى عانا كەدەي وتباسىنان شىققان - دۇنيەجۇزىلىك بانك
دۇنيەجۇزىلىك بانكتىڭ اعا ەكونوميسى سامسۋ راحاردجا قازاقستانداعى ەليتالى مەكتەپتەردىڭ جالپى ورتا ءبىلىمنىڭ ساپالى بولۋىنا پايداسىن تيگىزە الماي وتىرعانىن ايتتى، دەپ حابارلايدى قازاقپارات ءتىلشىسى.
دۇنيەجۇزىلىك بانك قازاقستاننىڭ مەملەكەتتىك قارجىسىنا جاساعان شولۋىن تانىستىردى. شولۋدىڭ نەگىزگى مازمۇنىن بايانداعان سامسۋ راحاردجا ءبىلىم بەرۋ سالاسىنداعى كەيبىر جاعىمسىز تەندەنتسيالارعا توقتالدى.
«قازاقستاندا ءبىلىم بەرۋ سالاسىنا بولىنگەن اقشانىڭ كەنەت وسكەنىن كورۋگە بولادى. بۇل وتە جاقسى باعىتتاعى دامۋ. ويتكەنى ءبىلىم دەگەن دامۋدىڭ وتە ماڭىزدى اسپەكتىسى. ءبىراق بىزگە وسى شىعىنداردى كوبەيتە وتىرىپ ساپالى ءبىلىم الۋعا جاقسى جاعداي جاساۋ ماڭىزدى. ساپالى بىلىمگە ءبارىنىڭ قولى جەتۋ كەرەك.
بۇل نەگە ماڭىزدى؟ بۇعان دەيىنگى جۇيە «ۇشكە» وقيتىنداردىڭ قالىڭ ءنوپىرى مەن ات توبەلىندەي «وزاتتاردى» قالىپتاستىردى. بۇل وزاتتاردىڭ نازاربايەۆ زياتكەرلىك مەكتەبىنىڭ جۇيەسىندە وقۋعا باسىم مۇمكىندىگى بار. Pisa زەرتتەۋىنىڭ قورىتىندىسىن كورگەن شىعارسىزدار. وقۋشىلار سۇراققا جاۋاپ بەرمەك تۇگىل، ونىڭ ماعىناسىن تۇسىنۋگە ساۋاتى جەتپەگەن. جالپى ءبىلىم بەرەتىن مەكتەپتەردەگى وقۋشىلاردىڭ 67 پايىزى «ساۋاتسىز» رەتىندە كورسەتىلگەن. ال ۇزدىك مەكتەپتەردىڭ وقۋشىلارى ەكونوميكالىق ىنتىماقتاستىق جانە دامۋ ۇيىمىنىڭ ورتاشا كورسەتكىشتەرىنەن جاقسى كورسەتكىش بايقاتقان. ءبىراق بۇل جالپى مەكتەپتەردىڭ جاعدايىن كورسەتپەيدى»، - دەدى ول.
ەكونوميست مۇنىڭ ءبارى وتكەن جۇيەدەن قالعان «مۇرا» ەكەنىن اتاپ، جۇيەنى جاقسارتۋ جاعىن ويلاۋ كەرەگىن ايتتى.
«ەلدەگى ەليتالى مەكتەپتەرگە باراتىن وقۋشىلاردىڭ 8 پايىزى عانا حالىقتىڭ تومەنگى قاباتىنداعى وتباسىنان شىققان. ياعني، الەۋمەتتىك مارتەبەسى بويىنشا تومەنگى قاباتتا تۇرعان 40 پايىزدىڭ ىشىنەن شىققان. بۇل جەردە ءبىز ەليتالى زياتكەرلىك مەكتەپتەر جالپى وقۋشىلاردىڭ ءبىلىمىن ساپالى ەتۋگە كومەكتەسە الماي وتىرعانىن كورەمىز»، - دەدى سامسۋ راحاردجا.
