قازاقستاندا ۇيالى تەلەفون نومىرلەرىن ساتىپ الۋ ءتاسىلى وزگەرمەك

استانا. KAZINFORM - الداعى ايلاردا SIM- كارتالاردى دۇكەندەردە ساتۋ توقتاتىلادى - ولاردى تەك بايلانىس وپەراتورلارىنىڭ كەڭسەلەرىندە جانە بيومەتريالىق تەكسەرۋدەن كەيىن عانا ساتىپ الۋعا بولادى.

الايدا ەندى ۇيالى بايلانىس نومىرلەرىن eGov پورتالى ارقىلى دا ساتىپ الۋعا مۇمكىندىك بەرىلەتىنى بەلگىلى بولدى. ءتيىستى تۇزەتۋلەردى سيفرلىق دامۋ مينيسترلىگى ازىرلەدى، - دەپ حابارلايدى Massaget.kz ءتىلشىسى.

مينيسترلىك جانىنداعى تەلەكوممۋنيكاتسيالار كوميتەتى ءتوراعاسىنىڭ ورىنباسارى ولجاس كابەنوۆتىڭ ايتۋىنشا، قازىر بايلانىس وپەراتورلارى مينيسترلىككە ءوتىنىش بەرەدى، ولارعا نومىرلەر جيىنتىعى (پۋل) بەرىلەدى، كەيىن بۇل نومىرلەردى قازاقستاندىقتار ساتىپ الا الادى.

مينيسترلىك تەلەكوممۋنيكاتسيا نارىعى مەن دەرەكتەردى وڭدەۋ ورتالىقتارىن دامىتۋ ماسەلەلەرى جونىندەگى زاڭ جوباسىنا وزگەرىستەر ەنگىزۋدى ۇسىندى.

«ءبىز بۇل زاڭ جوباسىندا نومىرلەردى تەك وپەراتورلار جەلىسى ارقىلى عانا ەمەس، سونداي-اق eGov ارقىلى دا تاراتۋ مۇمكىندىگىن قاراستىرىپ جاتىرمىز»، - دەدى ولجاس كابەنوۆ قۇجاتتى جاريا تالقىلاۋ كەزىندە.

وسىلايشا، قازاقستاندىقتار الداعى ۋاقىتتا وزدەرىنە ۇناعان ۇيالى بايلانىس ءنومىرىن ۇيدەن شىقپاي- اق ونلاين تۇردە تاڭداپ، راسىمدەي الۋى مۇمكىن. الايدا بۇل تۋرالى ناقتى ايتۋعا ءالى ەرتە: بۇل - تەك زاڭ جوباسى، ول ازىرگە تالقىلاۋ كەزەڭىندە. بۇل نورما قابىلدانا ما، قاشان كۇشىنە ەنەدى - ازىرگە بەلگىسىز.