قازاقستاندا رەسپۋبليكالىق جولداردىڭ بويىندا قىزمەت كورسەتۋ سالاسى قانداي

استانا. KAZINFORM - بۇگىندە رەسپۋبليكالىق ماڭىزى بار اۆتوجولداردىڭ بويىندا 1500 گە جۋىق جول بويى قىزمەتتەرىنىڭ نىساندارى جۇمىس ىستەيدى. ولاردىڭ ىشىندە شاعىن ءدامحانالاردان باستاپ ءىرى كوپفۋنكتسيونالدى كەشەندەرگە دەيىن بار.

قازاۆتوجول ۇلتتىق كومپانياسىنىڭ دەرەگىنشە، جىل سايىن جولدارداعى ينفراقۇرىلىمداردىڭ سانى ءوسىپ، ولاردىڭ ساپاسى مەن قىزمەت كورسەتۋى ارتۋدا.

جولداردىڭ ماڭىزدى ۋچاسكەلەرىندە جولاۋشىلار مەن جۇرگىزۋشىلەردىڭ قولايلى ءارى قاۋىپسىز دەمالۋىنا ارنالعان ءىرى نىساندار بوي كوتەرىپ جاتىر. ولاردىڭ ىشىندە:

• زاماناۋي جابدىقتالعان اۆتوجانارماي قۇيۋ بەكەتتەرى؛

• تولىققاندى تاماقتانۋعا ارنالعان كافەلەر مەن اسحانالار؛

• جۇرگىزۋشىلەر مەن جولاۋشىلارعا ارنالعان قوناق ءۇي بولمەلەرى مەن دەمالىس ايماقتارى؛

• جەڭىل جانە جۇك كولىكتەرىنە ارنالعان كەڭ اۆتوتۇراقتار؛

• تازا سانيتارلىق توراپتار، سونىڭ ىشىندە اجەتحانالار مەن دۋش كابينالارى؛

• مۇمكىندىگى شەكتەۋلى جاندارعا ارنالعان ينفراقۇرىلىم.

- مۇنداي كەشەندەر جاي عانا ايالداما ەمەس، بۇل - جانارماي قۇيىپ، تاماقتانىپ، دەمالىپ، تازالانىپ، جولدى ءارى قاراي قاۋىپسىز جالعاستىرۋعا مۇمكىندىك بەرەتىن تولىققاندى سەرۆيس حابتارى، - دەپ جازىلعان اقپاراتتا.

قازاۆتوجول وسىنداي نىسانداردىڭ جەلىسىن جىل سايىن ارتتىرىپ، تازالىققا، قولجەتىمدىلىككە جانە ستاندارتتارعا ساي بولۋعا ەرەكشە ءمان بەرىپ كەلەدى. جاڭا كەشەندەر جولداعى كولىك قوزعالىسى ەڭ تىعىز ۋچاسكەلەردە اشىلۋدا. بۇل كەز كەلگەن جۇرگىزۋشى، جۇك تاسىمالداۋشى بولسىن، ساياحاتتا جۇرگەن وتباسى بولسىن، ولارعا جولدا ساپالى سەرۆيسكە سەنىم ارتا الاتىنداي جاعداي جاساۋعا باعىتتالعان.

ايتا كەتەيىك، بيىل جولداردى جوندەۋگە 781 ميلليارد تەڭگە قاراستىرىلعان.