قازاقستاندا قانداي الكوگول ونىمدەرى قىمباتتايدى

ەلىمىزدە كەيبىر الكوگول ونىمدەرى قىمباتتايدى. بۇل تۋرالى ۇلتتىق ەكونوميكا ءمينيسترى الىبەك قۋانتىروۆ ايتتى، دەپ حابارلايدى Kazinform.

«مەنىڭشە، سىرا باعاسى قاتتى وسپەيدى. ويتكەنى ول وزىمىزدە شىعارىلادى. كۇشتىلىگى جوعارى كەيبىر الكوگول تۇرلەرىنە قاتىستى ماسەلە باسقا. ولاردىڭ اكتسيزى تومەن. قازىرگى ۋاقىتتا جاعداي تۇزەلدى. ياعني، ول اكسيزدەردىڭ باعاسى جىلدا ءوسىپ جاتىر. ويتكەنى ول ايلىق ەسەپتىك كورسەتكىشكە بايلانىستىرىلعان. ولار ناقتى ماندە ءبىر دەڭگەيدە تۇراقتى بولا المايدى. قىزدىرىلاتىن تەمەكىگە، الكوگولدىڭ كەيبىر تۇرلەرىنە اكسيز ەسەلەپ ءوستى»، - دەدى مينيستر ءماجىلىس وتىرىسىنان كەيىن ب ا ق وكىلدەرىنىڭ ساۋالىنا وراي.

ونىڭ اتاپ وتۋىنشە، ءسان- سالتانات سالىعى اياسىندا تاڭداۋلى الكوگولدەردىڭ اكسيزى كوتەرىلەدى.

«برەندي الكوگولدىڭ ءتۇرى بولعانىمەن، وعان از تولەدىك. ءبىراق ونىڭ اكسيزى كەمىندە اراقتىڭ اكسيزىمەن بىردەي بولۋى ءتيىس ەدى. قازىرگى ۋاقىتتا بۇل اكسيز بىرنەشە رەت كوتەرىلدى. يمپورتتالاتىن، اسىرەسە تاڭداۋلى الكوگولدەرگە قوسىمشا ءسان-سالتانات سالىعى ەنگىزىلەتىن بولادى. سالىق بىرنەشە ەسە ارتادى»، - دەدى الىبەك قۋانتىروۆ.

ايتا كەتەيىك، بۇگىن ءماجىلىستىڭ جالپى وتىرىسىندا سالىق كودەكسىنە وزگەرتۋلەر مەن تولىقتىرۋلار ەنگىزۋدى كوزدەگەن زاڭ جوباسىن 1-وقىلىمدا ماقۇلداندى. قۇجاتتا سىرا قايناتۋ ونىمدەرىنە اكسيز ستاۆكالارىن ليترىنە 79 تەڭگەدەن 90 تەڭگەگە دەيىن كوتەرۋ كوزدەلگەن.