قازاقستاندا ۇلتتىق جۇك اۆياكومپانياسى قۇرىلۋى مۇمكىن - ۇكىمەت
استانا. KAZINFORM - پرەمەر-مينيستر ولجاس بەكتەنوۆ اۆياتسيا سالاسىن دامىتۋ ماسەلەلەرى بويىنشا جيىن وتكىزدى. بۇل تۋرالى ۇكىمەتتىڭ باسپا ءسوز قىزمەتى ءمالىم ەتتى.
پرەزيدەنتتىڭ قازاقستاننىڭ اۆياتسيالىق حاب رەتىندەگى ءرولىن كۇشەيتۋ، اتاپ ايتقاندا، اۋە توراپتارىن دامىتۋ، جەرۇستى ينفراقۇرىلىمىن جاڭعىرتۋ جونىندەگى تاپسىرمالارىن جۇزەگە اسىرۋ بارىسى قارالدى. ۇلتتىق جۇك اۆياتاسىمالداۋشىنى قۇرۋ ماسەلەسىنە ەرەكشە نازار اۋدارىلدى.
كولىك مينيسترلىگىنىڭ مالىمەتىنشە، 2025-جىلدىڭ ءبىرىنشى جارتىجىلدىعىندا قازاقستاندىق اۆياكومپانيالار 7,2 ميلليون جولاۋشى تاسىمالداعان، بۇل وتكەن جىلدىڭ سايكەس كەزەڭىمەن سالىستىرعاندا 6 پايىزعا ارتىق. اۋەجايلاردا جولاۋشىلارعا قىزمەت كورسەتۋ كولەمى 14,4 ميلليون ادامعا دەيىن ارتتى. قازىرگى ۋاقىتتا ىشكى اۆياتاسىمالدار جالپى جيىلىگى اپتاسىنا 849 رەيس بولاتىن 61 باعدار بويىنشا ورىندالادى.
سوڭعى جىلدارى قازاقستاندا 20 ۇشۋ-قونۋ جولاعى، 19 تەرمينال رەكونسترۋكتسيالاندى، تۇركىستاندا جاڭا اۋەجاي سالىندى. كولىك ءمينيسترى نۇرلان ساۋرانبايەۆ بيىل اۋە كەمەلەرى پاركىن 16 بىرلىككە تولىقتىرۋ كۇتىلىپ وتىرعانىن، ونىڭ 6 ۋى بۇگىندە ساتىپ الىنعانىن باياندادى. جالپى، 2030-جىلدىڭ سوڭىنا دەيىن فلوت 221 بىرلىككە دەيىن ۇلعايتىلادى. سونداي- اق 2025-جىلى 36 باعداردى اشۋ جانە جاڭارتۋ جوسپارلانۋدا. ينۆەستيتسيالىق باعدارلامالار شەڭبەرىندە اۆياتسيا سالاسىنا بارلىعى شامامەن $2,9 ميلليارد تارتۋ كوزدەلىپ وتىر. قاراجاتتى ءىرى جوبالاردى جۇزەگە اسىرۋعا، اتاپ ايتقاندا، كاتونقاراعاي، زايسان، كەندىرلى، سونداي-اق ارقالىق تۋريستىك ايماقتارىندا جاڭا اۋەجايلار سالۋ، 10 ۇشۋ-قونۋ جولاعى مەن 10 تەرمينالدى رەكونسترۋكتسيالاۋ، ارنايى تەحنيكا پاركىن جاڭارتۋ جۇمىستارىنا جۇمسالماق.
جيىندا سونداي-اق جۇك اۆياكومپانياسىن قۇرۋ جونىندەگى باستامانىڭ ىسكە اسىرىلۋ بارىسى قارالدى. بۇل جوبا الەمدىك جۇك اۆياتاسىمالى نارىعىنىڭ تۇراقتى وسۋىنە بايلانىستى قولعا الىنعالى وتىر. بۇگىنگى تاڭدا ونداعى كولەم 57,7 ميلليون توننانى قۇرايدى، بۇل رەتتە تاسىمالداردىڭ شامامەن 15 پايىزى قازاقستاننىڭ اۋە كەڭىستىگى ارقىلى وتەدى.
«سامۇرىق-قازىنا» ءۇ ا ق» ا ق باسقارما ءتوراعاسى نۇرلان جاقىپوۆ الەمدىك تاجىريبەگە سايكەس باستاپقى كەزەڭدە ءۇش اۋە كەمەسىن جالعا الىپ، كەيىننەن فلوتتى ون بىرلىككە دەيىن كەڭەيتۋ كوزدەلىپ وتىرعانىن باياندادى. ۇلتتىق جۇك اۆياتاسىمالداۋشىنىڭ وپەراتورلىعىمەن العاشقى رەيستى ىسكە قوسۋ 2026-جىلدىڭ باسىنا جۇزەگە اسپاق. جوبا ءوزىن ءوزى اقتاۋى ءۇشىن وتىنمەن قامتاماسىز ەتۋدىڭ كەپىلدەندىرىلگەن كولەمى قاراستىرىلۋدا.
پرەمەر-مينيستر جۇك اۆياتاسىمالداۋشىنى قۇرۋ بويىنشا بارلىق دايىندىق پروتسەستەرىن بارىنشا جەدەلدەتۋدى تاپسىردى.
- پرەزيدەنت قاسىم-جومارت توقايەۆ قازاقستاندى ايماقتاعى جەتەكشى اۆياتسيالىق حاب رەتىندە كۇشەيتۋ مىندەتىن قويدى. قازىرگى تاڭدا اۋەجاي ينفراقۇرىلىمىن جانە ىشكى تاسىمالداردى دامىتۋ بويىنشا كەشەندى جۇمىستار جۇرگىزۋدە. سونىڭ ىشىندە جۇك اۆياتاسىمالداۋشىنى قۇرۋ - نەگىزگى جوبالاردىڭ ءبىرى. ونى جۇزەگە اسىرۋ ترانزيتتىك جۇك اعىندارىن قازاقستانعا قاراي بۇرۋعا مۇمكىندىك بەرەدى جانە جۇك اۆياتاسىمالى نارىعىنداعى ءبىزدىڭ ۇستانىمىمىزدى كۇشەيتەدى، - دەپ اتاپ ءوتتى ولجاس بەكتەنوۆ.
ايتا كەتەيىك، بۇعان دەيىن پرەمەر-مينيستر ولجاس بەكتەنوۆ پرەزيدەنت قاسىم-جومارت توقايەۆتىڭ مەديتسينا قىزمەتكەرلەرىن قورعاۋدى كۇشەيتۋ جانە دەنساۋلىق ساقتاۋ مەكەمەلەرىندەگى قاۋىپسىزدىكتى ارتتىرۋ جونىندەگى تاپسىرمالارىنىڭ ورىندالۋ بارىسى تۋرالى جيىن وتكىزگەن بولاتىن.
