قازاقستاندا كرەديت پەن شاعىن نەسيەنىڭ پايىزدىق ستاۆكاسى تومەندەيدى

استانا. KAZINFORM - قارجى نارىعىن رەتتەۋ جانە دامىتۋ اگەنتتىگى ۇلتتىق بانكپەن بىرلەسىپ، ەكىنشى دەڭگەيدەگى بانكتەر مەن ميكروقارجى ۇيىمدارىنداعى قارىزدار بويىنشا جىلدىق ءتيىمدى سىياقى ستاۆكانى تومەندەتەتىن قاۋلى جوباسىن ازىرلەدى.

ميكروكرەديت بويىنشا سوماسى 45 ا ە ك (166140 تەڭگە) دەيىنگى جانە 45 كۇنگە دەيىنگى كۇندەلىكتى نومينالدى مولشەرلەمەنىڭ شەكتى مولشەرىن %1 دان %0,3 عا دەيىن تومەندەتۋ ۇسىنىلادى.

سونىمەن بىرگە جىلدىق ءتيىمدى ستاۆكانىڭ شەكتى مولشەرىن %179 دەڭگەيىندە بەلگىلەۋ ۇسىنىلادى.

قارجى نارىعىن رەتتەۋ جانە دامىتۋ اگەنتتىگى قارجى ۇيىمدارىنىڭ ءادىسناماسى جانە پرۋدەنتسيالدىق رەتتەۋ دەپارتامەنتىنىڭ ديرەكتورى داۋرەن سالىمبايەۆتىڭ ايتۋىنشا، جالاقىعا دەيىنگى قارىزدار بويىنشا پايىزدىق مولشەرلەمەلەر شامامەن 3 ەسە تومەندەيدى.

بۇعان دەيىن قىسقا مەرزىمدى ميكروكرەديتتەردىڭ جىلدىق ءتيىمدى سىياقى مولشەرلەمەسى بويىنشا ەش شەكتەۋ بولماعان.

مۇنداي قارىزدار بويىنشا شەكتى نومينالدى مولشەرلەمە بەلگىلەنگەن.

مىسالى، 45 كۇندە %20 مولشەرلەمەمەن ناقتى جىلدىق ءتيىمدى مولشەرلەمە %346 بولاتىن. تاۋلىگىنە %1 جانە %20 ستاۆكا كەزىندە 20 كۇن ىشىندە ج ە س %2600 اسادى.

بۇدان باسقا، قازىرگى ۋاقىتتا بانكتەر مەن ميكروقارجى ۇيىمدارىنىڭ كەپىلسىز قارىزدارى بويىنشا جىلدىق ءتيىمدى سىياقى مولشەرلەمەسى - %56. بۇل مولشەر 2012 -جىلى بەلگىلەندى جانە سودان بەرى قايتا قارالمادى.

سونداي-اق، ازىرلەنگەن قاۋلى جوباسى بانكتەردىڭ كەپىلسىز كرەديتتەرى بويىنشا شەكتى جىلدىق مولشەرلەمەنى %56 دان %46 عا دەيىن، كەپىلدى كرەديتتەر بويىنشا %40 دان %35 عا دەيىن تومەندەتۋدى كوزدەيدى.

«كرەديت ستاۆكاسىنىڭ تومەندەۋى حالىقتىڭ بورىشتىق جۇكتەمەسىنىڭ تومەندەۋىنە ىقپال ەتەدى، ياعني قازاقستاندىقتار راسىمدەيتىن بارلىق جاڭا قارىزدار اناعۇرلىم تومەن مولشەرلەمەمەن بولادى جانە تيىسىنشە وسى كرەديتتەرگە قىزمەت كورسەتۋ قۇنى بورىشتىق جۇكتەمە سياقتى تومەن بولادى»، - دەدى داۋرەن سالىمبايەۆ.

اۆتور
ايجان سەرىكجان قىزى