قازاقستاندا جۇمىس ىستەيتىن شەتەلدىك كومپانيالاردىڭ جارتىسىنا جۋىعى رەسەيلىك - مەملەكەت باسشىسى
استانا. KAZINFORM - مەملەكەت باسشىسى قاسىم-جومارت توقايەۆ رەسەي پرەزيدەنتى ۆلاديمير پۋتيننىڭ قازاقستانعا جاساعان مەملەكەتتىك ساپارى اياسىندا وتكەن بريفينگتە ەكى اراداعى ينۆەستيتسيالىق بايلانىستاردىڭ نەگىزگى كورسەتكىشتەرىن اتادى.
«الداعى ەكى جىلدا ءوزارا ساۋدانىڭ كولەمىن 30 ميلليارد دوللاردان اسىرا الاتىنىمىزعا سەنىمدىمىن. قازاقستان ەكونوميكاسىنا تارتىلعان رەسەيلىك ينۆەستيتسيانىڭ كولەمى 24 ميلليارد دوللاردان استى. وسى سومانىڭ 4,5 ميلليارد دوللاردان استام بولىگى كەيىنگى ەكى جىلدا عانا سالىندى. رەسەي ەكونوميكاسىنا باعىتتالعان قازاقستاندىق ينۆەستيتسيا كولەمى 8,5 ميلليارد دوللار بولدى»، - دەدى مەملەكەت باسشىسى.
پرەزيدەنت قازاقستاندا رەسەيدىڭ ۇلەسى بار 24 مىڭعا جۋىق كومپانيا جۇمىس ىستەيتىنىن ەسكە سالدى.
«بۇل ءبىزدىڭ ەلدە جۇمىس ىستەيتىن شەتەلدىك كاسىپورىنداردىڭ جارتىسىنا جۋىعى دەگەن ءسوز. وسىناۋ كورسەتكىشتەر ءبىزدىڭ ستراتەگيالىق قارىم-قاتىناستارىمىزدى ودان ءارى نىعايتۋعا دەگەن سەنىم مەن ءوزارا قىزىعۋشىلىقتىڭ دەڭگەيى جوعارى ەكەنىن ايعاقتايدى»، - دەدى قاسىم-جومارت توقايەۆ.
