قازاقستاندا ج ي ارقىلى قوعامدىق ورىنداردا تاۋلىك بويى بەينەباقىلاۋ قوسىلادى
استانا. KAZINFORM - الداعى ۋاقىتتا «ۇلتتىق بەينەباقىلاۋ جۇيەسى» ەنگىزىلەدى. بۇل تۋرالى پرەمەر-ءمينيستردىڭ ورىنباسارى - جاساندى ينتەللەكت جانە سيفرلىق دامۋ ءمينيسترى جاسلان ماديەۆ مالىمدەدى.
- بەيبىتشىلىك پەن ادىلەتتى قوعام ورناتۋ ءۇشىن جانە مەملەكەتتىك ينستيتۋتتاردىڭ تيىمدىلىگىن ارتتىرۋدا زاماناۋي تەحنولوگيالاردىڭ ءرولى ەرەكشە. اتاپ ايتقاندا، جاساندى ينتەللەكت قۇقىقتىق قىزمەتتەردىڭ ساپاسىن ارتتىرىپ، قۇقىق قورعاۋ ورگاندارىنىڭ جۇمىسىن جەدەلدەتۋگە جانە ازاماتتاردىڭ قۇقىقتارىن قورعاۋعا كومەكتەسەدى، - دەدى جاسلان ماديەۆ سەناتتا ورنىقتى دامۋى سالاسىنداعى ۇلتتىق ماقساتتاردىڭ ىسكە اسىرىلۋىن مونيتورينگىلەۋ جونىندەگى پارلامەنتتىك كوميسسيانىڭ XI وتىرىسىندا.
ونىڭ ايتۋىنشا، وسى باعىتتا مينيسترلىك قۇقىق قورعاۋ ورگاندارىمەن بىرلەسىپ ءبىرقاتار جوبانى ىسكە اسىرىپ جاتىر. مىسالى، «قۇقىقتىق كەڭەس بەرۋ ج ي- اگەنتى» ازاماتتاردىڭ سۇراقتارىنا ناقتى جانە جەدەل جاۋاپ بەرىپ، قۇقىقتىق اقپاراتقا قولجەتىمدىلىكتى جەڭىلدەتەدى.
الداعى ۋاقىتتا «ۇلتتىق بەينەباقىلاۋ جۇيەسىن» ەنگىزۋ جوسپارلانعان. بۇل جۇيە جاساندى ينتەللەكت ارقىلى قوعامدىق ورىنداردا تاۋلىك بويى بەينەباقىلاۋدى قامتاماسىز ەتەدى.
- جۇيە ادامداردىڭ بەت-الپەتىن، كولىك نومىرلەرىن اۆتوماتتى تۇردە تانيدى، كۇمان تۋدىراتىن جاعدايلاردى - توبەلەس، ادامداردىڭ جينالۋى نەمەسە ۇمىت قالعان زاتتاردى تىركەيدى. وسىنىڭ ارقاسىندا قوعامدىق قاۋىپسىزدىك دەڭگەيى ەداۋىر ارتىپ، قۇقىق قورعاۋ ورگاندارىنىڭ ارەكەت ەتۋ جىلدامدىعى كۇشەيەدى، - دەدى مينيستر.
بۇدان بۇرىن حابارلانعانداي، بۇگىن پارلامەنت سەناتىندا قازاقستاننىڭ ورنىقتى دامۋى سالاسىنداعى ۇلتتىق ماقساتتار مەن مىندەتتەردىڭ ىسكە اسىرىلۋىن مونيتورينگىلەۋ جونىندەگى پارلامەنتتىك كوميسسيانىڭ XI وتىرىسى ءوتتى.
