قازاقستاندا فۋتبول ينفراقۇرىلىمىن دامىتۋ قاجەت - UEFA پرەزيدەنتى
استانا. KAZINFORM - ەۋروپا فۋتبول قاۋىمداستىقتارى وداعىنىڭ (UEFA) پرەزيدەنتى الەكساندەر چەفەرين قازاقستانعا رەسمي ساپارى اياسىندا ەلورداداعى قازاقستان فۋتبول فەدەراتسياسىنىڭ كەڭسەسىنە باردى.
چەفەرين ق ف ف-نىڭ شتاب- پاتەرىندە فەدەراتسيا پرەزيدەنتى مارات وماروۆپەن جۇزدەستى. سونداي-اق ول فۋتبول مۋزەيىن ارالاپ، «جەڭىس»، «استانا» جانە №8 مبجسورم فۋتبول ورتالىقتارىنىڭ جاس ويىنشىلارىمەن، سونىمەن قاتار س پ فۋتبول مەن Blind Football كومانداسىمەن كەزدەستى.
وسىدان كەيىن مارات وماروۆپەن الەكساندەر چەفەرين ب ا ق وكىلدەرىنە ارنالعان اقپاراتتىق بريفينگىگە قاتىستى.
- بۇگىن - ەل فۋتبولى ءۇشىن ەرەكشە كۇن. قازاقستانعا رەسمي ساپارمەن UEFA پرەزيدەنتى الەكساندەر چەفەرين مىرزا كەلىپ وتىر. بۇل ماڭىزدى ساپار - ەلىمىزدىڭ حالىقارالىق جان- جاقتى بايلانىستارىنىڭ تەرەڭدەي تۇسكەنىنىڭ تاعى ءبىر ناقتى دا جارقىن كورىنىسى، - دەدى وماروۆ.
ق ف ف پرەزيدەنتى مەملەكەت باسشىسى قاسىم-جومارت توقايەۆ UEFA پرەزيدەنتىن قابىلداپ، وتاندىق فۋتبولدىڭ قازىرگى جاعدايى مەن بولاشاعىنا قاتىستى ءبىرقاتار ءتۇيىندى ماسەلەنى تالقىلاعانىن ايتتى.
- قازاقستان فۋتبول فەدەراتسياسى تاراپىنان قازاق فۋتبولىن دامىتۋعا بايلانىستى ۇسىنىستارىمىزدى جەتكىزدىك. ولار نەگىزىنەن ەلىمىزدەگى فۋتبول ينفراقۇرىلىمىن جەتىلدىرۋ، بۇقارالىق فۋتبولدى قولداۋ جانە بالالار فۋتبولىن دامىتۋ باعىتتارىن قامتىدى. قازاقستان فۋتبولىنىڭ الەۋەتى زور. بىرلەسە جۇمىس ىستەپ، حالىقارالىق دەڭگەيدە جوعارى ناتيجەلەرگە جەتە الامىز دەپ بەك سەنەمىن، - دەدى وماروۆ.
ءوز كەزەگىندە الەكساندەر چەفەرين دە UEFA قازاقستان فۋتبولىنا قولداۋ كورسەتۋگە دايىن ەكەنىن اتاپ ءوتتى.
- بۇگىن پرەزيدەنت توقايەۆپەن وتە ناتيجەلى كەزدەسۋ وتكىزدىك. ونىڭ سپورت پەن فۋتبولدى ەرەكشە باعالايتىنىن بايقادىم. ويىمىز ءبىر جەردەن شىقتى: قازاقستاندا فۋتبول ينفراقۇرىلىمىن دامىتۋ قاجەت، - دەدى UEFA پرەزيدەنتى.
سونىمەن قاتار چەفەرين ەۋروپا فۋتبول قاۋىمداستىقتارى وداعى بولاشاقتا قازاقستان فۋتبولىن دامىتۋعا بارىنشا كومەكتەسىپ، ينۆەستيتسيا سالاتىنىن ايتتى.
- ءبىز ءوز مۇشەلەرىمىزدىڭ بارىنشا تابىستى بولعانىن قالايمىز. قازاقستاندا تالانتتى فۋتبولشىلار كوپ. سوندىقتان جاستاردى دامىتۋعا ەرەكشە كوڭىل ءبولۋ كەرەك، - دەدى چەفەرين.
ساپار سوڭىندا ەۋروپا فۋتبول باسشىسى ەلورداداعى فۋتبول ينفراقۇرىلىمىمەن تانىستى.
ايتا كەتەيىك، قازاقستان - 2002 -جىلدان باستاپ ۋەفا- نىڭ تولىققاندى مۇشەسى.
وسىعان دەيىن حابارلاعانىمىزداي، مەملەكەت باسشىسى قاسىم-جومارت توقايەۆ UEFA پرەزيدەنتى الەكساندەر چەفەريندى قابىلدادى.
ەسكە سالساق، بۇگىن فۋتبولدان استانادا الەمدىك جانە قازاقستاندىق فۋتبولشىلاردان قۇرالعان «اڭىزدار ويىنى» كەزدەسۋى وتەدى.
اۆتور
مۇحتار قاليموللا ۇلى
