قازاقستاندا «Embraer» ۇشاقتارىنا تەحنيكالىق قىزمەت كورسەتەتىن سەرۆيستىك ورتالىق اشىلۋى مۇمكىن
نيۋ-يورك. KAZINFORM - قاسىم-جومارت توقايەۆ Embraer كومپانياسىنىڭ پرەزيدەنتى فرانسيسكو گومەس نەتومەن كەزدەستى، دەپ حابارلايدى اقوردانىڭ باسپا ءسوز قىزمەتى.
برازيليالىق Embraer اۆيا قۇرىلىس كومپانياسى جەتەكشىسىمەن كەزدەسۋدە جۇك تاسىمالداۋ سالاسىنداعى ىنتىماقتاستىق ماسەلەلەرى تالقىلاندى. پرەزيدەنت ەلىمىزدىڭ ەۋرازيا كەڭىستىگىندەگى نەگىزگى كولىك-لوگيستيكالىق حابقا اينالۋعا ۇمتىلاتىنىن جەتكىزدى.
اڭگىمەلەسۋ بارىسىندا قازاقستاندا «Embraer» ۇشاقتارىنا تەحنيكالىق قىزمەت كورسەتەتىن وڭىرلىك سەرۆيستىك ورتالىق اشۋ پەرسپەكتيۆاسى قاراستىرىلدى. فرانسيسكو گومەس نەتو قازاقستاننىڭ كولىك- ترانزيتتىك الەۋەتىنە جوعارى باعا بەرىپ، ءوزارا ءتيىمدى ىنتىماقتاستىقتى جالعاستىرۋعا دايىن ەكەنىن راستادى.
بۇدان بۇرىن پرەزيدەنت ExxonMobil كورپوراتسياسىنىڭ باسشىلارىن قابىلدادى. مەملەكەت باسشىسى داررەن ۆۋدسپەن تەڭىز بەن قاشاعاننىڭ بولاشاعىن تالقىلادى.
