قازاقستاندا ءىرى ساۋدا نىساندارىن ساقتاندىرۋ جۇيەسى ەنگىزىلىپ جاتىر

استانا. KAZINFORM – ق ر توتەنشە جاعدايلار ۆيتسە-ءمينيسترى كەگەن تۇرسىنبايەۆ ازاماتتىق قورعاۋ سالاسىنداعى جاڭا زاڭ نورمالارىن ءتۇسىندىردى.

اتالعان زاڭنىڭ ىسكە اسىرىلۋى ازاماتتىق قورعاۋ ورگاندارى قىزمەتكەرلەرىنىڭ الەۋمەتتىك جانە قۇقىقتىق جاعدايلارىن جاقسارتۋعا، سونداي-اق توتەنشە جاعدايلاردى الدىن الۋ مەن ولاردى جويۋ جۇمىستارىنىڭ جالپى تيىمدىلىگىن ارتتىرۋعا باعىتتالدى.

— ادامدار جاپپاي باراتىن وبەكتىلەردە جانە بيىكتىگى 28 مەتردەن اساتىن عيماراتتاردا ءورت قاۋىپسىزدىگىن قامتاماسىز ەتۋ ماقساتىندا مينيسترلىكتىڭ اۋماقتىق ورگاندارى نىساندى پايدالانۋعا بەرۋ كەزىندە ولاردىڭ ءورت قاۋىپسىزدىگى تالاپتارىنا سايكەستىگى تۋرالى قورىتىندى شىعارادى. بۇل نورمانى ەنگىزۋ ءورت قاۋىپسىزدىگى تالاپتارىن بۇزعان وبەكتىلەردى ىسكە قوسۋ جانە ودان ءارى پايدالانۋ فاكتىلەرىنىڭ الدىن الۋعا مۇمكىندىك بەرەدى، - دەدى كەگەن تۇرسىنبايەۆ ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.

سونىمەن قاتار، زارداپ شەككەندەرگە كەلتىرىلگەن زالالدى وتەۋ ءۇشىن اۋدانى 2 مىڭ شارشى مەتردەن اساتىن ساۋدا نىساندارىن ساقتاندىرۋ جۇيەسى ەنگىزىلىپ جاتىر.

- ءورت اۆتوماتيكاسىن مونتاجداۋعا جانە تەحنيكالىق قىزمەت كورسەتۋگە رۇقسات بەرۋ، سونداي-اق «حان شاتىر مەن ەكسپو سياقتى وبەكتىلەردى سالۋعا ارنالعان ارنايى تەحنيكالىق شارتتاردى كەلىسۋ تۋرالى نورمالار ەنگىزىلدى، - دەدى ۆيتسە-مينيستر.

بۇدان باسقا، توتەنشە جاعدايلار قاۋپى تۋىنداعان نەمەسە ورىن العان كەزدە، حالىقتى جەدەل حاباردار ەتۋ سالاسىندا ماڭىزدى وزگەرىستەر ەنگىزىلدى. اتاپ ايتقاندا، جەدەل- كەزەكشى قىزمەتتىڭ جاۋاپتى وكىلدەرى ۋاكىلەتتى لاۋازىمدى تۇلعالاردىڭ الدىن الا بۇيرىعىنسىز حابارلاندىرۋ جۇيەسىن ءوز شەشىمىمەن ىسكە قوسا الادى. مۇنداي قادام شەشىم قابىلداۋ ۋاقىتىن قىسقارتىپ، حالىقتىڭ قاۋىپسىزدىگىن جوعارى دەڭگەيدە قامتاماسىز ەتەدى.

ەسكە سالساق، بيىل 24 -ماۋسىمدا مەملەكەت باسشىسى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ازاماتتىق قورعاۋ، ەلەكتر ەنەرگەتيكاسى جانە مەملەكەتتىك مۇلىكتى باسقارۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭىنا قول قويدى.

اۆتور

رۋسلان عابباسوۆ