قازاقستاندا عىلىم قالالارى پايدا بولادى

استانا. KAZINFORM - اباي وبلىسى (كۋرچاتوۆ قالاسى) مەن الماتى وبلىسىنىڭ (تالعار اۋدانى، ءتۇزۋساي اۋىلى) اۋماعىندا ەكى عىلىم قالاشىعىن قۇرۋ جۇمىستارى باستالدى. بۇل تۋرالى عىلىم جانە جوعارى ءبىلىم ۆيتسە-ءمينيسترى دارحان احمەد-زاكي ءمالىم ەتتى.

город Курчатов
Фото: Альбина Халел

- ءبىرىنشىسى كۋرچاتوۆ قالاسىندا ورنالاسادى، «عىلىم قالاسى» مارتەبەسىن بەرۋدىڭ بارلىق كريتەرييلەرىنە سايكەس كەلەدى. مۇندا عىلىمي ۇيىمدار مەن جوعارى وقۋ ورىندارىنىڭ زياتكەرلىك الەۋەتى شوعىرلانعان. قالادا تاۋ-كەن ونەركاسىبى مەن وڭدەۋ سالالارى العا قويىلعان. كۋرچاتوۆتا ۇلتتىق يادرولىق ورتالىعى مەن يادرولىق تەحنولوگيالار پاركى ا ق جۇمىس ىستەپ تۇر، - دەدى دارحان احمەد-زاكي سەنات قابىرعاسىندا وتكەن عىلىم قالاشىقتارىن دامىتۋ ماسەلەلەرىنە ارنالعان وتىرىستا.

ۆيتسە-ءمينيستردىڭ مالىمدەۋىنشە، ەكىنشى عىلىم قالاسى الماتى وبلىسىنىڭ اۋماعىندا پايدا بولادى.

- ەكىنشى عىلىم قالاسى الماتى وبلىسىندا ۇلكەن الماتى اينالما اۆتوموبيل جولىنا ىرگەلەس ۋچاسكەدە قۇرىلادى، جاقىن جەردە يادرولىق فيزيكا ينستيتۋتى ورنالاسقان. سونىمەن قاتار بۇل جوبانى ىسكە اسىرۋ مەملەكەت باسشىسىنىڭ جوعارى وقۋ ورىندارىن الماتى قالاسىنان وبلىستارعا كوشىرۋ قاجەتتىلىگى تۋرالى تاپسىرماسىن ورىنداۋعا مۇمكىندىك بەرەدى. قازىر «بايسەركە- اگرو» ج ش س عىلىم قالاشىعىنىڭ اۋماعى ءۇشىن قاجەتتى ينجەنەرلىك ينفراقۇرىلىم جۇرگىزۋگە تەحنيكالىق تەكسەرۋ جۇرگىزىپ جاتىر، - دەيدى ول.

سونداي-اق دارحان احمەد-زاكي پرەمەر-ءمينيستردىڭ ورىنباسارى تامارا دۇيسەنوۆانىڭ 2024-جىلعى 16-قازانداعى حاتتامالىق تاپسىرماسى بويىنشا ءبىزدىڭ مينيسترلىك عىلىمدى قۇرۋ جانە دامىتۋ تۇجىرىمداماسىنىڭ جوباسى ازىرلەنگەنىن ءمالىم ەتتى.

- تۇجىرىمداما جوباسى 8 بولىمنەن تۇرادى. وندا ماقسات، مىندەتتەر، اعىمداعى جاعدايدى تالداۋ، حالىقارالىق تاجىريبە، كوزقاراس تاعى باسقا جايتتار كورسەتىلگەن. كرەمني القابى (ا ق ش)، دەدەك (وڭتۇستىك كورەيا)، تسۋكۋبا (جاپونيا) تاعى سول سياقتى عىلىم قالالارىن قۇرۋدىڭ حالىقارالىق تاجىريبەسى زەرتتەلدى، - دەپ تولىقتىردى ۆيتسە-مينيستر.

قازاقستاندا عىلىم قالاشىعى قىزمەتىنىڭ نەگىزگى باعىتتارى:

- اگروونەركاسىپتىك كەشەندى دامىتۋ جانە ەكسپورت پەن ازىق-تۇلىك قاۋىپسىزدىگىن ارتتىرۋ ءۇشىن ءونىمدى قايتا وڭدەۋ؛

- اتوم ەنەرگەتيكاسى تەحنولوگيالارىن جانە تۇراقتى ەنەرگەتيكا ءۇشىن جاڭا ماتەريالداردى ەنگىزۋ، كومپوزيتتەر مەن قورىتپالارعا نازار اۋدارا وتىرىپ مەتاللۋرگيانى دامىتۋ، ۆاكسينالار مەن ءدارى-دارمەك وندىرۋگە ارنالعان بيوتەحنولوگيالار، اۆتوماتتاندىرۋ جانە باسەكەگە قابىلەتتىلىك ءۇشىن جاساندى ينتەللەكتىنى قولدانۋ، جاسىل ەكونوميكا ءۇشىن جاڭارتىلاتىن ەنەرگيا كوزدەرىن پايدالانۋ، سونداي-اق ونەركاسىپكە قاجەتتى جابدىق ازىرلەۋ ءۇشىن ماشينا جاساۋ.

ودان بولەك، «عىلىم قالاسى» جوبالىق كومانداسى (عىلىم جانە جوعارى ءبىلىم مينيسترلىگى جوبالىق كەڭسەسىنىڭ بازاسىندا) جانە عىلىم قالاسىن دامىتۋ ماسەلەلەرىن ۇيلەستىرۋ جونىندەگى جۇمىس توبى («الماتى باس جوسپارى» عىلىمي-زەرتتەۋ ينستيتۋتى بازاسىندا) قۇرىلدى.

ايتا كەتەيىك، بۇگىن سەناتتىڭ حالىقارالىق قاتىناستار، قورعانىس جانە قاۋىپسىزدىك كوميتەتىندە كۋرچاتوۆ قالاسىن عىلىمي ورتالىققا اينالدىرۋ ماسەلەلەرى قارالدى.

جيىن بارىسىندا سەنات دەپۋتاتى عالياسقار سارىبايەۆ عىلىمدى باسقارۋدا ءالى دە بيۋروكراتيانىڭ بارىن ايتتى.

سوڭعى جاڭالىقتار