قازاقستاندا ءبىرىڭعاي مەديتسينالىق كومەك تۋرالى زاڭ ازىرلەنەدى
استانا. KAZINFORM - ەلىمىزدە كەپىلدەندىرىلگەن بازالىق جانە ساقتاندىرۋ پاكەتتەرىنەن تۇراتىن ءبىرىڭعاي مەديتسينالىق كومەك تۋرالى زاڭ جوباسى ازىرلەنىپ جاتىر. تولىعىراق ق ر پرەمەر-ءمينيستردىڭ ورىنباسارى تامارا دۇيسەنوۆا ايتىپ بەردى.
«بىرىنشىدەن، كەپىلدەندىرىلگەن بازالىق جانە ساقتاندىرۋ پاكەتتەرىنەن تۇراتىن مەديتسينالىق كومەكتىڭ ءبىرىڭعاي پاكەتىن قاراستىراتىن زاڭ جوباسى ازىرلەنەدى. ول ءوز كەزەگىندە جۇيەنى تولىق قارجىلاندىرۋدى تالاپ ەتەدى. سوندىقتان جوبادا قارجىلىق تۇراقتىلىقتى قامتاماسىز ەتۋ ماقساتىندا رەسمي تۇردە جۇمىسسىز بولىپ تىركەلگەن ازاماتتار ءۇشىن جارنانى جەرگىلىكتى بيۋدجەت ەسەبىنەن تولەۋ، سونداي-اق، جارنانى ەسەپتەۋدەگى تابىستىڭ جوعارى شەگى جانە تولەمدەردىڭ ستاۆكالارىن قايتا قاراۋ كوزدەلۋدە»، - دەدى تامارا دۇيسەنوۆا ۇكىمەت وتىرىسىندا.
ۆيتسە-پرەمەردىڭ ايتۋىنشا، دەنساۋلىق ساقتاۋ مينيسترلىگى ازىرلەگەن زاڭ جوباسى ۇكىمەتكە وسى ايدىڭ سوڭىنا دەيىن ەنگىزىلەدى.
«ەكىنشىدەن، جۇيەنى تولىق سيفرلاندىرۋ بويىنشا ءتيىستى جول كارتاسىن جۇزەگە اسىرۋدى جالعاستىرامىز. ونىڭ اياسىندا جىل سوڭىنا دەيىن مەديتسينالىق ساقتاندىرۋ قورىن سيفرلاندىرۋ اياقتالادى. ال كەلەر جىلدىڭ سوڭىنا دەيىن ءبىرىڭعاي ۇلتتىق اقپاراتتىق جۇيەنى ەنگىزۋ جوسپارلانىپ وتىر»، - دەيدى ول.
