قازاقستاندا بەس جۇزدەن استام ۇرپاعى بار وتباسى تۇرادى

استانا. قازاقپارات - 2013- جىلى جامبىل وبلىسى، سورتوبە اۋىلىندا تۇراتىن فۋليندەر وتباسىندا فامە اجە اۋلەتتىڭ بەسىنشى ۇرپاعى - نەمەنەنىڭ كىندىگىن ءوزى كەسكەن بولاتىن. ءبىر داستارحان باسىندا - ءبىر اۋلەتتەن تاراعان 500 ادام.

ال اۋلەتتىڭ بەرەكەسى مەن ۇيىتقىسى بولىپ وتىرعان فامە اجە بولسا سول جىلى 100 جاسىن تويلاعان.

قۇرساعىنان تاراعان پەرزەنتتەرىنەن كەيۋانا 79 نەمەرە، 339 شوبەرە مەن 69 شوپشەك ءسۇيىپ وتىر.

18 جاسىندا تۇرمىسقا شىققان فامە فۋلينا - 10 قۇرساق كوتەرگەن باتىر انا.

كوزى ءتىرى ءۇشىنشى ۇلىنىڭ جاسى 77 گە اياق باسسا، ەڭ ۇلكەن نەمەرەسى 60 تى القىمدادى.

«وسىنشاما پەرزەنتتى ءوسىرۋ دە وڭايعا سوقپادى. اۋىر جۇمىس ىستەسەم دە، بەينەتكە مويىعان جوقپىن.

ەندى مىنە، قاراپ وتىرسام، عاسىردىڭ ءوزى قاس-قاعىم ءسات سەكىلدى». كەيۋانا وتكەن ءومىرىن وسىلاي ەسكە الادى.

فامە فۋلين، عاسىر جاساعان اجە:

نەمەرە-شوبەرەلەرىمدى جازباي تانيمىن. شوپشەككە كەلگەندە، كارىلىك قوي شاتاستىرىپ جاتام. ءبىزدىڭ ۇيدە ادام ازايعان ەمەس. انا رەتىندە ولاردىڭ ىنتىماقپەن كۇن كەشىپ جاتقانىن كورۋ - مەن ءۇشىن ۇلكەن باقىت.

ەگدە تارتقانىنا قاراماستان فامە اجە ءالى كۇنگە تىڭ. قيمىلى دا شيراق. اۋىل ارالاپ كەتپەسە دە، سىرتقا ءوزى بارىپ كەلەدى. ۇل-قىزى مەن كەلىندەرى ۇلگى تۇتاتىن بويىندا كوپ قاسيەت بار ءالى كۇنگە.

سەليمە فۋلين، قىزى:

انامىز - اۋلەتىمىزدىڭ تىرەگى، ارقاسۇيەرىمىز. جاسىمىز ۇلعايىپ كەتسە دە، ءالى كۇنگە اقىل-كەڭەسىن ايتىپ وتىرادى. ءبىز باقىتتى جاندارمىز. انامىزبەن ماقتانامىز.

فۋليندەر اۋلەتىنىڭ ءبارى اۋىلداعى ءبىر كوشەنىڭ بويىندا تۇرادى. ءبىر ءبىرىمەن قوڭسى. تاتۋلىعى بەرىك. ىنتىماعى اجىراعان ەمەس.

مۇحاممەد فۋلين، شوپشەگى:

مەكتەپتىڭ ءار سىنىبىندا 3-4 فۋلين بىرگە وقيدى. ءبارىمىز تۋىسقانبىز. وزگەلەر كوبىنە بىزگە قىزىعا قارايدى. سوندا بارلىعىڭ ءبىر اۋلەتتەن تاراعانسىڭدار ما، دەپ سۇراپ جاتادى.

دۇنگەن ۇلتى شوعىرلانعان سورتوبەنى باتىر انالاردىڭ مەكەنى دەسە دە بولادى. الاقانداي اۋىلدا 600 دەن استام كوپبالالى وتباسى تۇرادى. ءبىراق، ولاردىڭ ەشبىرى سانى جاعىنان فۋليندەر اۋلەتىنە جەتە المايدى.

عاني قالماحانوۆ