قازاقستاندا اسكەري-تەحنيكالىق وقۋ ورىندارىنىڭ جۇيەسى تولىقتاي قايتا قارالادى

باس اسكەري پروكۋراتۋرامەن بىرلەسە اسكەري-تەحنيكالىق مەكتەپتەردىڭ جۇيەسىن تولىقتاي قايتا قاراۋ جوسپارلانىپ وتىر.

بۇل تۋرالى قورعانىس ءمينيسترى رۋسلان جاقسىلىقوۆ ءمالىم ەتتى، دەپ حابارلايدى Kazinform.

بۇگىن ماجىلىستەگى باسپا ءسوز ءماسليحاتىندا تىلشىلەر مينيستردەن اسكەري وقۋ ورىندارىنداعى الىمجەتتىك سياقتى زاڭعا قايشى ارەكەتتەردى جويۋ ماسەلەسىنە قاتىستى سۇراق قويدى.

«وسىعان دەيىن ءبىراز ادامدى قىزمەتىنەن بوساتىپ، ءتارتىپتى كۇشەيتىپ جاتىرمىز. قازىر باس اسكەري پروكۋراتۋرامەن بىرلەسە اسكەري-تەحنيكالىق وقۋ ورىندارىنىڭ جۇيەسىن تولىعىمەن قايتا قاراۋدى جوسپارلاپ وتىرمىز. بۇل رەتتە اۋقىمدى جۇمىس اتقارىلماق. قورعانىس ءمينيسترى رەتىندە ارميا ماسەلەسىمەن اينالىسىپ جاتىرمىن. سونىمەن قاتار، سالاداعى باسقا دا ءىس-شارالار نازاردان تىس قالىپ وتىرعان جوق»، - دەدى ر. جاقسىلىقوۆ.

ايتا كەتەيىك، بۇگىن ءماجىلىستىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە رەزەرۆتەگى قىزمەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمدا ماقۇلداندى.

زاڭ جوباسىندا اسكەري قىزمەتتىڭ جاڭا ءتۇرىن - رەزەرۆتەگى قىزمەتتى ەنگىزۋ ۇسىنىلدى. رەزەرۆتەگى قىزمەت - بۇل اۋماقتىق قاعيداتى بويىنشا (تۇرعىلىقتى جەرى بويىنشا) اسكەري قىزمەتتىڭ ەرىكتى ءتۇرى.