قازاقستاندا 1414 بايلانىس ورتالىعىنداعى ءاربىر 50-قوڭىراۋدى جاساندى ينتەللەكت وڭدەيدى
استانا. KAZINFORM - قازاقستاندا جاساندى ينتەللەكت 1414 بايلانىس ورتالىعىنىڭ جۇمىسىندا سىنالا باستادى. ەندى ءاربىر 50-قوڭىراۋدى وپەراتوردىڭ ورنىنا ج ي- اسسيستەنت وڭدەيدى.
بۇل تۋرالى سيفرلىق دامۋ، يننوۆاتسيالار جانە اەروعارىش ونەركاسىبى ۆيتسە-ءمينيسترى روستيسلاۆ كونياشكين حابارلادى.
جاساندى ينتەللەكت كومەگىمەن قىزمەتتەردى ەنگىزۋ جاقىندا ەلگە كەلگەن جاڭا سۋپەركومپيۋتەردىڭ ىسكە قوسىلۋىنىڭ ارقاسىندا مۇمكىن بولدى. ج ي كومەكشىلەرى ەكى باعىتتا ىسكە قوسىلىپ جاتىر. ءبىرىنشىسى - Egov Mobile موبيلدى قوسىمشاسىنداعى كومەك.
- ەگەر بىرەۋ ChatGPT نەمەسە وسىعان ۇقساس بوتتاردى قولدانعان بولساڭىز، وندا ءسىز مەنىڭ نە تۋرالى ايتىپ تۇرعانىمدى تۇسىنەسىز. ماتىندىك فورماتتا كەڭەس الىڭىز جانە بىردەن سمارتفوننىڭ ىشىندە اشۋعا بولاتىن مەملەكەتتىك قىزمەتكە سىلتەمە الىڭىز، - دەپ ءتۇسىندىردى ۆيتسە-مينيستر.
ەكىنشى باعىت - بايلانىس ورتالىعىن اۆتوماتتاندىرۋ. روستيسلاۆ كونياشكيننىڭ ايتۋىنشا، ج ي كومەكشىسى نەسيەگە شەكتەۋلەر قويۋ نەمەسە انىقتاما الۋ سياقتى نەگىزگى قىزمەتتەردى اتقارا الادى.
- قازىردىڭ وزىندە ءاربىر 50-قوڭىراۋ سول جەرگە جىبەرىلەدى. وپەراتور ەمەس، ج ي- اسسيستەنت وڭدەۋ ءۇشىن. كەيبىر قاراپايىم نەگىزگى قىزمەتتەردى وسى فورماتقا اۋدارۋعا تىرىسامىز. مەنىڭ ويىمشا، ازاماتتار مۇنى جازدىڭ سوڭىنا دەيىن سەزىنەدى، - دەدى كونياشكين.
ونىڭ ايتۋىنشا، مەملەكەتتىك قىزمەتتەر سالاسىنا ج ي- ءدى اۋقىمدى تۇردە ەنگىزۋ ەلەۋلى ينفراقۇرىلىمدى قاجەت ەتتى. سۋپەركومپيۋتەردى العاننان كەيىن اقپاراتتىق جۇيەلەردى سول جەرگە كوشىرۋ جۇمىستارى باستالدى. ۆيتسە-ءمينيستردىڭ ايتۋىنشا، جاقىن ارادا بۇل ونىمدەردىڭ بارلىعىن ازاماتتارعا تولىق قۋاتتا شىعارۋعا بولادى.
قازاقستاندىق ج ي ەندى ۆيدەونى 5 تىلگە اۋدارىپ، ۇلتتىق ناقىشتا سۋرەت سالاتىنىن جازعان بولاتىنبىز.
