قازاقستانعا تيەسىلى تەلەفون كودتارى بەلگىلى بولدى

استانا. KAZINFORM - سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى 7+ كودىن قازاقستان مەن رەسەي قالاي بولىسەتىنىن ايقىندايتىن قاۋلى جوباسىن كوپشىلىك تالقىلاۋىنا شىعارىپ وتىر.

- قازاقستان رەسپۋبليكاسى دۇنيەجۇزىلىك نومىرلەۋدىڭ 7-ايماعىندا 70+، 76+، 77+ كود اۋقىمدارىن پايدالانادى. ال رەسەي فەدەراتسياسىنا تيەسىلى كود اۋقىمدارى: 72+، 73+، 74+، 75+، 79+ - دەپ جازىلعان قۇجاتتا.

ەسكە سالساق، بىلتىر كۇزدە سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ قازاقستان نەگە رەسەيمەن بىرگە 7+ كودىنىڭ اۋماعىندا قالعانىنا تۇسىنىك بەرگەن ەدى.

- شىنىمەن دە دۇنيەجۇزىلىك نومىرلەۋدىڭ 7-ايماعىن بىرلەسىپ (رەسەيمەن بىرگە) پايدالانىپ جاتىرمىز. الايدا وسى جەتىلىك اياسىندا بىزدە قوسىمشا نومىرلەۋ بار جانە ول تەك قازاقستانعا تيەسىلى. بۇل تۇرعىدا «77+»، «76+» بار، سونداي-اق قوسىمشا «70+» بويىنشا كەلىسىمگە كەلەمىز. بۇل نومىرلەۋ تەك قازاقستانعا قاتىستى بولادى، - دەگەن جاسلان ماديەۆ.